चितवन । विश्वका एक सयभन्दा बढी देशमा कोरोना भाइरस (कोभिड १९) को संक्रमण देखा परेसँगै पर्यटन क्षेत्र नराम्रोसँग प्रभावित भएको छ । चितवनको प्रमुख पर्यटकीय गन्तव्य सौराहामा यतिबेला विदेशी पर्यटकको संख्या शुन्य छ । स्वदेशी पर्यटकको आगमन पनि ह्वात्तै घटेपछि सौराहाका होटल व्यवसायीले कामदारलाई घरबिदामा पठाउन थालेका छन् ।
क्षेत्रीय होटेल संघ सौराहा, चितवनका अध्यक्ष दिपक भट्टराईले कोरोना भाइरसको त्रासका कारण सिजनको बेला सौराहा सुनसान हुन पुगेको बताए । ‘सिजनमा ६५ प्रतिशत अकुपेन्सी हुने सौराहामा अहिले मुश्किलले १५ प्रतिशत अकुपेन्सी छ’ उनी भन्छन्, ‘सिजनमा ४० प्रतिशत चिनियाँ, ४० प्रतिशत नेपाली र अन्य देशका २० प्रतिशत पर्यटक आउँथे । अहिले विदेशी पर्यटक छँदै छैनन् ।’ पर्यटक नै नआएपछि सौराहाका होटल व्यवसायीहरुले बाध्य भएर आधा कामदारलाई आधा तलब दिने गरी घरबिदामा पठाउन थालेको उनले जानकारी दिए ।
पर्यटकीय हिसाबले चितवनलाई नेपालको तेस्रो गन्तव्य मानिन्छ । काठमाडौँ र पोखरापछिको पर्यटकीय गन्तव्य चितवन आउने आन्तरिक र बाह्य पर्यटकको पहिलो रोजाई सौराहा नै हो । विश्व सम्पदामा सूचीकृत चितवन राष्ट्रिय निकुञ्जको मुख्य प्रवेशद्वार सौराहा पर्यापर्यटनका लागि प्रसिद्ध छ । विश्वकै दुर्लभ वन्यजन्तु एकसिंगे गैँडा, दुर्लभ पाटेबाघलगायतका वन्यजन्तु र यहाँका आदिवासी थारुको जीवनशैली र सँस्कृति अवलोकन गर्न पर्यटकहरु सौराहा आउँछन् ।
रत्ननगर नगरपालिकाको वडा नम्बर ६ मा पर्ने सौराहा यसअघि भारतीय नाकाबन्दी र विनाशकारी भूकम्पले सुनसान बनेको थियो । सौराहामा रहेका एक सय २० भन्दा बढी होटेलमा पाँच हजार पाँच सय बेड क्षमता छ ।
सौराहापछिको पर्यटकीय गन्तव्य मेघौलीमा पनि पर्यटक आगमन घटेको छ । विदेशी पर्यटक आउने मेघौली सेराई र बाराही जंगल लजमा कोठाहरु रित्तै छन् । विदेशी पर्यटकहरुको बुकिङ सबै रद्द गरिएका छन् । न्यून संख्यामा नेपाली पर्यटक रात बिताउन आउने गरेका छन् ।
बाराही जंगल लजका महाप्रबन्धक वरुण कुमार आफूकहाँ नेपाली पर्यटकमात्र रहेको जानकारी दिँदै भन्छन्, ‘७० प्रतिशत विदेशी पर्यटकले बुकिङ रद्द गराएका छन् । कूल ४१ बेडमध्ये पाँच बेडमात्र अकुपाई भएको छ ।’ पर्यटक नभएपनि कामदारलाई छुट्टी दिनेबारे अहिले नसोचेको उनी बताउँछन् । ‘दुई–तीन हप्ता अरु हेरौँ, के हुन्छ ?’ उनी भन्छन्, ‘त्यसपछि मात्र कामदारलाई के गर्ने भन्नेबारे निर्णय लिन्छौँ ।’
भरतपुरको चौबीसकोठीबाट २५ किलोमिटर पश्चिममा पर्ने मेघौली क्षेत्रमा रहेका १० होटलमा ३ सय ५५ जना र १० वटा होमस्टेमा ८० जना पर्यटकलाई खाने र बस्ने सुविधा रहेको छ ।
प्रतिक्रिया दिनुहोस
सूर्यप्रकाश कँडेल
विहीबार, २९ फागुन २०७६, ११ : २०
लेखकबाट थप
सम्बन्धित समाचारहरु
सौराहाको रोजगारी र आयको मुख्य स्रोत पर्यापर्यटन
सौराहामा स्थानीय तहका ‘असल अभ्यास’ आदान प्रदान कार्यक्रम सुरु
सौराहामा फुड फेस्टिभल सुरु
‘भ्यालेन्टाइन डे’को अवसरमा सौराहामा फुड फेष्टिवल हुने
सौराहामा हात्तीलाई वनभोज
‘अफ सिजन’मा पर्यटक आएपछि सौराहाका व्यवसायी उत्साहित