चितवनमा दशैँ तिहारमा ८६ जुवाडे पक्राउ

चितवन । चितवन प्रहरीले दशैँ तिहारको समयमा जुवातास खेल्ने ८६ जनालाई पक्राउ गरेको छ । प्रहरीको सुरक्षा योजना अन्तर्गत विभिन्न स्थानबाट उनिहरुलाई तास खेलीरहेको अवस्थाबाट पक्राउ गरीएको प्रहरी प्रवक्ता प्रहरी नायव उपरिक्षक एक नारायण कोइरालाले बताए । 

उनीहरुलाई असोज २० गतेदेखि कार्तिक १३ गतेसम्मको अवधिमा पक्राउ गरिएको हो । जिल्ला प्रहरी कार्यालयका अनुसार पूर्वी चितवनको खैरहनी नगरपालिका १ बाट सबैभन्दा धेरै २० जना एकै स्थानबाट कौडा र १ लाख ९१ हजार ८४५ रुपैयाँसहित नियन्त्रणमा लिइएको थियो । 
भरतपुर महानगरपालिकाका विभिन्न स्थानबाट ५४ जना, कालिका नगरपालिकाबाट १२ जना पक्राउ परेका हुन् । पक्राउ पर्नेहरु सबै पुरुष रहेको प्रहरीले जनाएको छ ।

उनीहरुको साथबाट जुवा तास खेल्न प्रयोग गरिरहेको ११ लाख ९९ हजार १ सय ६५ रुपैयाँ नगद पनि बरामद गरेको प्रहरीले जनाएको छ । उनीहरु माथि अनुसन्धान भइरहेको जनाइएको छ ।