संसद् परिसरमा पत्रकारका लागि आधारभूत सुविधा सुनिश्चित गर्न सांसद सुनारको माग

काठमाडौँ । रास्वपा सांसद खगेन्द्र सुनारले संसदीय गतिविधि कभरेजमा खटिने पत्रकारका लागि संसद् परिसरमा न्यूनतम आधारभूत सुविधा सुनिश्चित गर्न माग गरेका छन्।

प्रतिनिधि सभाको बैठकमा बोल्दै उनले संसद् बाहिर रिपोर्टिङमा संलग्न सञ्चारकर्मीहरूले भोग्नुपरेको असुविधाप्रति ध्यानाकर्षण गराएका हुन्।

सांसद सुनारले जनतालाई सूचना प्रवाह गर्ने जिम्मेवारीमा निरन्तर खटिने पत्रकारलाई कम्तीमा पिउने पानी र शौचालय प्रयोगको सहज व्यवस्था हुनुपर्ने बताए।

उनले मौसम अनुसार आवश्यक संरक्षणको अभावका कारण पत्रकारहरूले वर्षामा उपकरण जोगाउन र घाममा काम गर्न कठिनाइ भोग्नुपरेको उल्लेख गरे।

संसद् परिसरमा सञ्चारकर्मीमाथि भइरहेको व्यवहारले अन्तर्राष्ट्रिय स्तरमै नकारात्मक सन्देश जाने अवस्था सिर्जना हुन सक्ने भन्दै उनले पत्रकारमैत्री कार्य वातावरण निर्माण गर्न सम्बन्धित निकायको ध्यानाकर्षण गराएका छन्।