२३ सयभन्दा बढी किशोरीलाई एचपिभी खोप

काठमाडौँ। गुल्मी जिल्लामा लक्षित समूहका २३ सयभन्दा बढी बालबालिका र किशोरीले पाठेघरको क्यान्सर रोकथामको लागि एचपिभी खोप प्राप्त गरेका छन्।

स्वास्थ्य कार्यालय गुल्मीका कोल्डचेन असिस्टेन्ट श्याम कुमार पालका अनुसार माघ २५ देखि फागुन २ गतेसम्म जिल्लाभरका सबै स्थानीय तहमा खोप अभियान सञ्चालन गरिएको हो। अभियानअन्तर्गत कुल २४ सय ६२ बालिकालाई खोप लगाउने लक्ष्य तोकिएकोमा २३ सय ५८ जनाले खोप लगाएका छन्।

उक्त अभियानमा रेसुंगा नगरपालिकामा ३१९ जना (लक्ष्य ३१४), मुसीकोट नगरपालिकामा २६८ जना (लक्ष्य २९१), इस्मा गाउँपालिकामा १६८ जना (लक्ष्य १८१), कालीगण्डकी गाउँपालिकामा ११४ जना (लक्ष्य १२१), गुल्मीदरबार गाउँपालिकामा १२९ जना (लक्ष्य १४०), चन्द्रकोट गाउँपालिकामा १७३ जना (लक्ष्य १८०), छत्रकोट गाउँपालिकामा १७६ जना (लक्ष्य १६६) र धुर्कोट गाउँपालिकामा २०२ जनाले खोप लगाएका छन्।

मदाने गाउँपालिकामा २११ जना, मालिका गाउँपालिकामा २७१ जना, रुरुक्षेत्र गाउँपालिकामा १५७ जना र सत्यवती गाउँपालिकामा १७० जना किशोरीले खोप लगाएका छन्।

खोप अभियान विद्यालयमा कक्षा ६ मा अध्ययन गर्ने छात्रा र विद्यालय नजाने १० वर्षका किशोरीलाई लक्षित गरेर सञ्चालन गरिएको थियो। अभियान सफल बनाउन २२८ खोप केन्द्रमा समान संख्यामा स्वास्थ्यकर्मी र स्वास्थ्य स्वयंसेवक परिचालन गरिएको थियो।

गत वर्ष यस जिल्लामा १० हजार ८४३ बालिकालाई एचपिभी खोप लगाइएको थियो। यस वर्ष मुख्य रूपमा कक्षा ७ देखि १० का छात्रा र विद्यालय बाहिर रहेका ११–१४ वर्षका किशोरीलाई लक्षित गरिएको अभियान थियो।