उपभोक्ताका पक्षमा बनेका कानुन पूर्ण रूपमा कार्यान्वयन हुन सकेनन् : मन्त्री सिन्हा

काठमाडौँ। उद्योग, वाणिज्य तथा आपूर्ति मन्त्री अनिलकुमार सिन्हाले उपभोक्ताको हित संरक्षणका लागि बनेका कानुनहरू अपेक्षाअनुसार कार्यान्वयन हुन नसकेको बताएका छन्। कानुन निर्माण मात्रै पर्याप्त नहुने उल्लेख गर्दै उनले त्यसको प्रभावकारी कार्यान्वयनका लागि सरकार सक्रिय रूपमा लागिपर्ने बताएका हुन्।

विश्व उपभोक्ता अधिकार दिवस २०८२ को अवसरमा आयोजित कार्यक्रममा बोल्दै मन्त्री सिन्हाले उपभोक्ताको हितका लागि सहयोग पुर्‍याउने सबै पक्षप्रति धन्यवाद व्यक्त गरे। “सुरक्षित उत्पादन, विवेकशील उपभोक्ता र जिम्मेवार प्रशासन” भन्ने मूल नारासहित कार्यक्रम मनाइएको जानकारी दिँदै उनले उपभोक्ताको अधिकार संरक्षणका लागि सरकारले थप पहल गरिरहेको बताए।

मन्त्री सिन्हाले अनुगमन भइरहे पनि बजारमा कहाँ–कहाँ समस्या छ भन्ने विषय स्पष्ट रूपमा पहिचान हुन नसक्दा हाल ग्यास आपूर्तिमा समस्या देखिएको उल्लेख गरे। उनले केही दिनभित्र आफू मन्त्री पदबाट बाहिरिने संकेत गर्दै बाँकी अवधिमा उपभोक्ताको हितमा केही पहल गर्ने प्रतिबद्धता पनि व्यक्त गरे।