निर्वाचन परिणामपछि मधेश केन्द्रित दलका नेताहरू छलफलमा

काठमाडौँ । प्रतिनिधि सभा निर्वाचनको परिणाम सार्वजनिक भएपछि मधेश केन्द्रित राजनीतिक दलका शीर्ष नेताहरू सामूहिक छलफलमा जुटेका छन्।

संघीय लोकतान्त्रिक मोर्चाको पहलमा आयोजित बैठक काठमाडौँको बबरमहलस्थित लोकतान्त्रिक समाजवादी पार्टी (लोसपा) को केन्द्रीय कार्यालयमा जारी रहेको जनाइएको छ। निर्वाचनमा अपेक्षित नतिजा प्राप्त हुन नसकेपछि मोर्चासम्बद्ध दलहरूबीच पहिलो पटक संयुक्त रूपमा बैठक बसेको हो।

बैठकमा जनमत पार्टीका अध्यक्ष सीके राउत, लोसपाका अध्यक्ष महन्थ ठाकुर तथा राष्ट्रिय मुक्ति पार्टीका अध्यक्ष राजेन्द्र महतो लगायत नेताहरू सहभागी रहेका छन्।

छलफलमा प्रतिनिधि सभा निर्वाचनको परिणामको समीक्षा, पछिल्ला राजनीतिक घटनाक्रम तथा मधेश क्षेत्रको राजनीतिक प्रतिनिधित्वसम्बन्धी विषयमा विचार–विमर्श भइरहेको बताइएको छ।

हालै सम्पन्न प्रतिनिधि सभा निर्वाचनमा मधेश केन्द्रित कुनै पनि दलले प्रत्यक्षतर्फ एक सिटसमेत जित्न नसकेपछि त्यसको कारण र आगामी रणनीतिबारे नेताहरूबीच छलफल भइरहेको स्रोतले जनाएको छ।