प्रतिनिधि सभा निर्वाचनका लागि प्रत्यक्षतर्फको मतपत्र छपाइ कार्य सुरु

काठमाडौँ । आगामी फागुन २१ गते तोकिएको प्रतिनिधि सभा निर्वाचनका लागि प्रत्यक्ष निर्वाचन प्रणालीअन्तर्गत प्रयोग हुने मतपत्रको छपाइ कार्य सुरु गरिएको छ ।

सोमबार निर्वाचन आयोगका प्रमुख निर्वाचन आयुक्त रामप्रसाद भण्डारीसहितका पदाधिकारीहरूले सानोठिमीस्थित जनक शिक्षा सामग्री केन्द्र लिमिटेडमा पुगेर मतपत्र मुद्रण कार्यको अवलोकन गरेका थिए । निरीक्षणपश्चात् आयोगले प्रत्यक्षतर्फ करिब दुई करोड तीन लाख २३ हजार मतपत्र छपाइ प्रक्रिया प्रारम्भ भएको जानकारी दिएको छ ।

प्रमुख निर्वाचन आयुक्त भण्डारीका अनुसार उक्त मुद्रण कार्य करिब १५ दिनभित्र सम्पन्न गर्ने लक्ष्य लिइएको छ । यसअघि समानुपातिक प्रणालीतर्फका लागि करिब दुई करोड आठ लाख ५० हजार मतपत्र छपाइको काम सम्पन्न भइसकेको आयोगले जनाएको छ ।

आयोगले आगामी फागुन ५ गतेभित्र सबै निर्वाचन क्षेत्रमा आवश्यक मतपत्र पठाइसक्ने योजना बनाएको छ । मतपत्रको सुरक्षासम्बन्धी व्यवस्था मिलाइसकिएको र निर्वाचनको समग्र तयारी निर्धारित कार्यतालिकाअनुसार अघि बढिरहेको आयोगको भनाइ छ ।

यसअघि जनक शिक्षा सामग्री केन्द्रले प्रत्यक्ष प्रणालीका लागि करिब ११ लाख नमुना मतपत्र छापेर आयोगलाई हस्तान्तरण गरिसकेको थियो ।