रास्वपाद्वारा बालेन्द्र शाहसँगको ‘बृहत एकता’ सहमति केन्द्रीय समितिबाट अनुमोदन

काठमाडौ । राष्ट्रिय स्वतन्त्र पार्टी (रास्वपा) ले काठमाडौं महानगरपालिकाका मेयर बालेन्द्र शाहसँग भएको ‘बृहत एकता’ सम्बन्धी सहमति केन्द्रीय समितिबाट अनुमोदन गरेको छ।

पार्टी सभापति रवि लामिछानेको अध्यक्षतामा आइतबार बसेको रास्वपाको केन्द्रीय समितिको विशेष बैठकले उक्त सहमति अनुमोदन गर्ने निर्णय गरेको हो। बैठकमा सहमतिको राजनीतिक औचित्य, सम्भावना र भावी कार्यदिशाबारे छलफल भएपछि केन्द्रीय समितिले यसलाई ऐतिहासिक निर्णयको रूपमा अघि बढाउने निष्कर्ष निकालेको प्रवक्ता मनिष झाले बताए । 

रास्वपाले मुलुकमा व्याप्त भ्रष्टाचार, वेथिति र कुशासनको अन्त्य गर्दै सुशासन, समुन्नति, लोकतन्त्र र सामाजिक न्यायको स्थापना गर्ने उद्देश्यका साथ उक्त बृहत एकता गरेको जनाएको छ। पार्टीले यस सहमतिलाई राष्ट्र हितका लागि गरिएको ठूलो आँट, त्याग र आशाको प्रतिविम्बका रूपमा व्याख्या गरेको छ।

केन्द्रीय समितिले बृहत एकता सम्बन्धी सहमतिको पूर्ण कार्यान्वयन गर्ने प्रतिबद्धता पनि व्यक्त गरेको छ। रास्वपा र बालेनबिच आइतबार बिहान ७ बुँदे सहमति गरेको थियो । सहमतिअनुसार बालेन शाह रास्वपाबाट राजनीतिमा होमिने भएका छन् ।