युक्रेनमा रुसको भीषण हमला

एजेन्सी । युक्रेनमा रुसको पछिल्लो हमलाले युद्धलाई फेरि एकपटक खतरनाक मोडमा पुर्‍याएको छ । पछिल्लो ४८ घण्टाभित्र रुसी सेनाले करिब ३६ ब्यालिस्टिक मिसाइल र लगभग ६०० ड्रोनमार्फत हमला गरेको युक्रेनी अधिकारीले जनाएका छन् । 

हमलामा धेरै ठूला ऊर्जा केन्द्रहरूमा क्षति पुगेको छ । करिब १५ लाख मानिस अन्धकारमा बस्न बाध्य भएका छन् ।
 
खेरसोन, सूमीको ठूलो भाग, खारकिभ सहर र खारकिभ क्षेत्रको विल्भास्थित सैन्य आधारमा भएका हमलाहरूले बिजुली आपूर्ति ठप्प भएको छ । हमलाले युक्रेनको सैन्य क्षमता र नागरिक पूर्वाधार दुवैलाई गम्भीर असर पुर्‍याएको छ । 

यी हमलाहरूमा २० भन्दा बढी नागरिकको मृत्यु भएको छ । युक्रेनी सञ्चार माध्यम सस्पिल्ने र किर्भिक इन्डिपेन्डेन्टले युक्रेनी ऊर्जा मन्त्रालय र स्थानीय प्रशासनलाई उद्धृत गर्दै दिएको जानकारी अनुसार रुसले ऊर्जा संरचना र सैन्य आधारहरूलाई लक्षित गरेको थियो ।
 
खेरसोन र सूमी क्षेत्रका प्रमुख विद्युत् सबस्टेसनहरू र ट्रान्सफर्मर स्टेशनहरूलाई निशाना बनाइएकाले सम्पूर्ण क्षेत्रमा लामो समयका लागि विद्युत् सेवा कटौती भएको छ । 

खारकिभ सहर र यसको वरपरका क्षेत्रहरूमा बिजुली आपूर्ति अवरुद्ध हुनुका साथै पानीका पम्पिङ स्टेसनहरू र ट्राम–मेट्रोजस्ता सहरी सुविधाहरू बन्द भएका छन् ।

युक्रेनी सेनाका अनुसार, रुसले ४८ घण्टामा करिब तीन दर्जनभन्दा बढी ब्यालिस्टिक मिसाइल र ६०० जति ड्रोन प्रहार गरेर ‘स्याचुरेसन अट्याक’को रणनीति अपनाएको छ । 

युद्धमाथि नजर राख्ने धेरै अन्तर्राष्ट्रिय सामरिक थिंक ट्यांक जस्तै इन्स्टिच्युट फर द स्टडी अफ वार र स्टकहोम इन्टरनेशनल पिस रिसर्च इन्स्टिच्युट (सिप्री)ले पहिले नैरुसले जाडो र ऊर्जामा निर्भर महिनाहरू नजिकिँदै गर्दा युक्रेनको बिजुली र तातो पानीको सुविधामा आक्रमण तीव्र पार्न सक्ने चेतावनी दिएका थिए । 

यसको मुख्य उद्देश्य सामाजिक–आर्थिक दबाब बढाएर किभलाई वार्ता वा सहुलियतहरूको लागि दबाब दिनु रहेको देखिन्छ ।