युक्रेनद्वारा कालोसागरमा रुसका दुई ट्यांकरमाथि ड्रोन प्रहार

एजेन्सी । युक्रेनले कालोसागरमा रूसी‘स्याडो फ्लिट’ मा समावेश दुई तेल ट्यांकरमाथि समुद्री ड्रोनमार्फत् प्रहार गरेको छ ।

युक्रेनी अधिकारीहरूको पुष्टि अनुसार ‘काइरोस’ र ‘भिराट’ नामका दुवै ट्यांकर गाम्बिया झन्डा बोकेर गुडिरहेका थिए । बीबीसीले प्रमाणित गरेको भिडियोमा पानीमा तीव्र गतिमा अघि बढेका ड्रोन ट्यांकरमा ठोक्किएर आगोको गोला बनेको र कालो धुवाँ आकाशमा उडेको देखिन्छ । 

ट्यांकरहरू टर्की तट आसपास शुक्रबार आक्रमणमा परे भने ‘भिराट’ शनिबार पुनः लक्ष्य भएको बताइएको छ । मानवीय क्षति भने नभएको अधिकारीहरूले जनाएका छन् । यी जहाजहरू रूसले पश्चिमी प्रतिबन्ध छल्न प्रयोग गर्दै आएको भनिने ‘स्याडो फ्लिट’मा पर्ने मानिन्छन् । पुराना तथा अस्पष्ट स्वामित्व भएका सयौं जहाज प्रयोग गरी रूसी तेललाई बजारसम्म लैजान यसको उपयोग हुँदै आएको बताइन्छ ।

काइरोस कालोसागरको दक्षिण–पश्चिम भागमा र भिराट पूर्वतिर रहेको मध्य क्षेत्रमा प्रहारमा परेको जनाइएको छ । दुवै जहाज प्रतिबन्ध सूचीमा परेका छन् । बीबीसी युक्रेनी सेवाका स्रोतहरूका अनुसार आक्रमणमा युक्रेनी सुरक्षा सेवाले बनाएको ‘सी बेबी’ नामक नौसैनिक ड्रोन प्रयोग गरिएको हो ।

टर्की अधिकारीहरूले दुवै ट्यांकरलाई सहयोग गरिरहेको र काइरोसमा लागेको आगो निभाउने प्रयास गरिएको भिडियोसमेत सार्वजनिक गरेका छन् । विश्लेषकहरूका अनुसार यो आक्रमण रूसको तेल आम्दानीमै चोट पुर्‍याउने उद्देश्यले युक्रेनले आक्रमण रणनीति कडा बनाएको संकेत हो ।

यसैबीच, क्यास्पियन क्षेत्रको तेल ढुवानी गर्ने प्रमुख कन्सोर्टियमले नोभोरोसिस्क बन्दरगाह नजिक मानवरहित डुंगाको आक्रमणपछि बन्दरगाहबाट तेल लोड गर्ने काम स्थगित गरेको जनाएको छ । कन्सोर्टियमका अनुसार मुरिङ पोइन्टमा गम्भीर क्षति पुगेको छ।

उता, युक्रेनी राष्ट्रपति भोलोदिमिर जेलेन्स्कीले शीर्ष सुरक्षा अधिकारी रुस्तेम उमेरोभको नेतृत्वमा टोली अमेरिकातर्फ प्रस्थान गरेको र युद्ध अन्त्यसम्बन्धी सहमति–वार्ता निरन्तरता दिने जनाएका छन् ।

अघिल्ला प्रमुख वार्ताकार आन्द्रिय येर्माकको निवासमा भ्रष्टाचारविरोधी निकायले छापा मारेसँगै उनले राजीनामा दिएका थिए ।