आफ्नो जन्मदिनमा शाहरुखले फ्यानहरूसँग किन मागे माफी ?

एजेन्सी । बलिउड अभिनेता शाहरुख खानले आफ्नो जन्मदिनमा भेट्न आएका प्रशंसकहरूसँग माफी मागेका छन्।

उनले आइतबार (नोभेम्बर २) बान्द्रास्थित आफ्नो घर 'मन्नत'मा ६०औँ जन्मदिन मनाइरहेका थिए। त्यस क्रममा उनलाई भेट्न ठूलो संख्यामा उनका फ्यान निवास बाहिर भेला भएका थिए। 

तर अधिकारीहरूले आफूलाई भिडमा नजान सल्लाह दिएकाले घरबाहिर निस्केर उनीहरूलाई भेट्न नसकेको भन्दै क्षमायाचना गरेका हुन्। 

शाहरुख खानले सामाजिक सञ्जाल प्लेटफर्म एक्समा लेखेका छन्, ‘अधिकारीहरूले मलाई घर बाहिर नजान भनेकाले तपाईंहरू प्रियजनलाई भेट्न सकिनँ, जो मेरो प्रतीक्षामा हुनुहुन्थ्यो।’

उनले अगाडि लेखेका छन्, ‘तपाईंहरू सबैसँग दिलदेखि माफी चाहन्छु। भिड नियन्त्रण गर्न गाह्रो हुने भएकाले सबैको सबैको सुरक्षाका लागि यो कदम उठाइएको भनेर मलाई भनिएको छ।’

आफूलाई विश्वास गर्न आग्रह गर्दै शाहरुखले आफ्ना फ्यानलाई भेट्न नपाएकामा उनीहरू भन्दा आफू बढी दुःखी भएको पनि उल्लेख गरेका छन्।