लुम्बिनीमा जनमतकी निलमले लिइन् सांसदको शपथ

रूपन्देही । लुम्बिनी प्रदेश सभाले जनमत पार्टीमा रिक्त रहेको समानुपातिक सदस्यमा निलम पासवानलाई नियुक्त गरेको छ ।

लुम्बिनी सांस्कृतिक नगरपालिका वडा नम्बर ३ रुपन्देहीकी पासवान पार्टीकी कार्यकारणी सदस्य हुन् । पासवानले शुक्रबार पद तथा गोपनीयताको सपथ ग्रहण गरेकी छन्।

लुम्बिनी प्रदेशका सभामुख तुलाराम घर्ती मगरले पासवानलाई नियुक्त गरेका हुन्। निर्वाचन आयोगले जनमत पार्टी नेपालको समानुपातिकको बन्दसूची ४ को दलित कलस्टरको १ नम्बरमा रहेका पासवानलाई प्रदेश सभा सदस्यमा निर्वाचित भएको घोषणा गरेको थियो ।

यसअघि आदिवासी जनजाति कलस्टरका प्रदेश सभा सदस्य गीता गुरुङले पदबाट राजीनामा दिएपछि सो ठाउँ रिक्त थियो । जनमत पार्टीले कलस्टर अनुसार नाम सिफारिस गरेपछि पासवान निर्वाचित भएकी हुन्।

लुम्बिनी प्रदेशमा ८७ प्रदेश सभा सदस्य छन् । त्यसमध्ये जनमत पार्टीका ३ जना प्रदेश सभा सदस्य छन् ।