उम्मेदवार टुंग्याउनु अगाडी रास्वपाले आकांक्षीहरुलाई किन भेट्न पठाउँदैछन् रवि लामिछाने ?

काठमाडौं । रुपन्देही–३ को उपनिर्वाचन नजिकिँदै गर्दा राष्ट्रिय स्वतन्त्र पार्टी (रास्वपा) भित्र सरगर्मी बढेको छ । पार्टीले आज दिउँसो १ः३० बजे सचिवालय बैठक बसेर उम्मेदवार घोषणा गर्ने तयारी गर्दैछ । तर, त्यसअघि नै उम्मेदवार बन्ने आकांक्षीहरू नख्खु कारागार पुगेर पार्टी सभापति रवि लामिछानेलाई भेट्न लागिरहेका छन् ।

लामिछाने हाल सहकारी ठगी प्रकरणमा पुर्पक्षका लागि थुनामा छन् । केही समयअघि मात्र भैरहवा कारागारबाट उनलाई काठमाडौंको नख्खु कारागार सारिएको हो । यद्यपि जेलभित्र रहेका लामिछाने अझै पनि पार्टीको प्रमुख निर्णयकर्ताको हैसियतमा छन्, जसका कारण उम्मेदवार आकांक्षीहरू उनलाई भेट्न आतुर देखिएका हुन् ।

रुपन्देही–३ मा रास्वपाबाट उम्मेदवार बन्न नौ जना आकांक्षी छन् । पार्टीले ७ देखि २१ साउनसम्म आवेदन माग्दा तीमध्ये केन्द्रीय सदस्य कुसुम महर्जन, क्षेत्रीय सभापति मधु अर्याल, अमेरिकाबाट फर्किएका सुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, जीतबहादुर गुप्ता, रचना क्षेत्री र पुनम अग्रवाल आंकाक्षी छन् । यस सूचीमा कुसुम, मधु, सुलभ र जीतबहादुरबाहेक अरू पाँच जना भैरहवाकै हुन् ।

सभापतिको निर्देशन नभई सचिवालयले निर्णय गदैन । निर्णय अगाडी आकांक्षीले रवि लामिछानेलाई भेट्न खोज्नुभित्र उम्मेदवारको नाडी अन्तिम क्षणमा सभापतिले नै छाम्न खोजेका हुन् ।

पार्टी भित्र कसलाई टिकट दिने भन्ने अन्तिम निर्णय सचिवालयले गर्ने भए पनि आकांक्षीहरूले रवि लामिछानेसँग प्रत्यक्ष संवाद गरेर आफ्नो उपस्थितिलाई बलियो बनाउन चाहेका हुन् । नख्खु कारागारमा पुगेर भेट्नुको अर्थ, सभापतिको आशीर्वाद मात्र होइन, अन्तिम निर्णयमा आफूलाई जोड्ने ‘सन्देश’ दिनु पनि रहेको आकांक्षीमध्येका एक नेताले बताए ।

थुनामा रहेका लामिछानेसँग भेट्न आकांक्षीहरूको लाइन लाग्नुले रास्वपा भित्रको शक्ति समीकरण प्रष्ट देखाउँछ । पार्टी औपचारिक रूपमा सचिवालय निर्णय गर्ने भए पनि कार्यकर्तादेखि आकांक्षी उम्मेदवारसम्मको विश्वास भने अझै रवि लामिछानेकै वरिपरि केन्द्रित छ ।

यसकारण उम्मेदवार घोषणा हुनु अघि नख्खु कारागार पुगेका आकांक्षीहरूको प्रयासलाई धेरैले ‘रविको सहमति बिना टिकट पाउन कठिन’ भन्ने बुझाइसँग जोडेर हेरिरहेका छन् ।

रविले कार्यवाहक सभापति डिपी अर्याललाई पनि यस भेटघाट पछि टेलिफोनमा सन्देश छोडने र त्यही आधारमा सचिवालयले निर्णय गर्ने रास्वपा नेताहरुको भनाई छ । सभापतिको निर्देशन नभई सचिवालयले निर्णय गदैन । निर्णय अगाडी आकांक्षीले रवि लामिछानेलाई भेट्न खोज्नुभित्र उम्मेदवारको नाडी अन्तिम क्षणमा सभापतिले नै छाम्न खोजेका हुन् ।

आकांक्षीहरुलाई सभापति भेटन रास्वपाका नेताहरुले नै निर्देशन गरेका हुन् । रविले नै आकांक्षीहरुलाई आफुसँग भेटन पठाउन गरेको आग्रहका आधारमा उनीहरु नख्खु काागारमा रवि भेटन जान लागेका हुन् ।

२०७९ सालको प्रतिनिधि सभा निर्वाचनमा रुपन्देही–३ बाट राष्ट्रिय प्रजातन्त्र पार्टीका दीपक बोहरा विजयी भएका थिए। बोहराको निधन भएपछि यो क्षेत्र रिक्त बनेको हो र अब कात्तिक १७ गते उपनिर्वाचन हुँदैछ ।