बौद्ध धर्मावलम्बीले आज पञ्चदान पर्व मनाउँदै

भादगाउँ । दीपङ्कर बुद्धको पूजाअर्चना गरेर बौद्ध धर्मावलम्बीहरूले आज पञ्चराँ (पञ्चदान) पर्व मनाउँदै छन् । हरेक वर्ष आज भाद्र कृष्ण त्रयोदशीका दिन यो पर्व मनाउने गरिन्छ ।

आज दीपङ्कर भनेर पुजिने बुद्धका पाँच स्वरूपमध्ये भक्तपुरको प्रशन्नशील महाविहार काठमाडौंको मूल दीपङ्कर बुद्ध, चर्तुब्रह्म महाविहार साकोठाको दीपङ्कर बुद्ध, मङ्गलधर्म दीप महाविहार झौरवहीको दीपङ्कर बुद्ध, जयकीर्ति महाविहार थथुवही इटाछेंको दीपङ्कर बुद्ध र बौद्ध समकृत विहार कुथुवही भक्तपुर मिनीबस पार्कको दीपङ्कर बुद्धलाई भक्तपुर वडा नम्बर ९ सूर्यमढीस्थित डबलीमा राखेर पूजा गर्ने प्रचलन छ ।

सूर्यमढी टोलस्थित आदिपद्म महाविहारमा मूल पुजारी  द्वारा पञ्चदान प्रारम्भ गरेपछि पाँच दीपङ्कर बुद्धका प्रतिमालाई बाजागाजा तथा स्तोत्रपाठका साथ नगर  परिक्रमा गराइन्छ ।

केही दशकयता भक्तपुरमा यो पर्व बौद्ध धर्मावलम्बी बाहेकका नेवार समुदायले पनि मनाउँदै आएका छन् ।