४७ ग्राम ब्राउन सुगरसहित दुई जना नियन्त्रणमा

काठमाडौँ । त्रिभुवन अन्तर्राष्ट्रिय विमानस्थलको गेट नजिकै रहेको होटेलबाट असार १३ गते सशस्त्र प्रहरीले ४७ ग्राम ९ मिलिग्राम ब्राउनसुगरसहित दुई जनालाई नियन्त्रणमा लिएको छ ।

नियन्त्रणमा लिइएकाहरूमा सिरहा जिल्लाको सिरहा नगरपालिका-८ बस्ने ४० वर्षीय मोहम्मद अख्तर मिया र धनुषा जिल्लाको कमला नगरपालिका-८ बस्ने ४२ वर्षीय सामन यादव छन् ।

उनीहरूलाई सशस्त्र प्रहरी बलको ईन्टेलिजेन्स ब्युरोको विशेष सूचनाको आधारमा सोही ठाउँमा रहेको दर्शन नमस्ते ईन होटेलबाट किनबेच गर्ने तयारी गरिरहेको समयमा ब्राउन सुगर र जोख्न प्रयोग हुने एक थान तराजु, ३ थान मोबाइल , २ वटा पासपोर्ट तथा नगद १२ हजार १ सय ७५  सहित नियन्त्रणमा लिएको हो ।

उनीहरूले विगत लामो समयदेखि धनुषाको विभिन्न ठाउँहरूबाट लागू औषध ल्याई काठमाडौँमा बेचबिखन गर्दै आएको बताइएको छ । नियन्त्रणमा लिइएका दुवै जनालाई बरामद ब्राउनसुगरसहित आवश्यक कारवाहीको लागि सम्बन्धित निकायमा बुझाउने प्रक्रियामा रहेको छ ।