६ महिनापछि लाइसेन्स लिएर मात्र घरजग्गाको कारोबार गर्न पाइने

काठमाडौं। सरकारले घरजग्गाको कारोबारका लागि लाइसेन्स लिनुपर्ने व्यवस्थालाई कडाइ गर्ने भएको छ । ६ महिना भित्र यो व्यवस्था लागू गर्ने सरकारको तयारी छ ।उच्चस्तरीय आर्थिक सुधार सुझाव आयोगको प्रतिवेदन कार्यान्वयन गर्दै सरकारले लाइसेन्स लिएर मात्र घरजग्गाको कारोबार गर्ने व्यवस्थामा कडाइ गर्न लागेको हो ।

‘मालपोत ऐनमा भएको व्यवस्था अनुरूप घरजग्गा व्यवसायको लाइसेन्स लिएर मात्र घरजग्गा कारोबार गर्नुपर्ने व्यवस्था कार्यान्वयन गर्ने,’ उच्चस्तरीय आर्थिक सुधार सुझाव आयोगको प्रतिवेदन कार्यान्वयनको २१९ नम्बर बुँदामा भनिएको छ । 

घरजग्गा कारोबारका नाममा भइरहेको राजश्व चुहावट रोक्न सकारले लाइसेन्स लिएर मात्र घरजग्गाको कारोबार गर्न सकिने नीति लिएको थियो ।भूमि व्यवस्था, सहकारी तथा गरिवी निवारण मन्त्रालयले ६ महिनामा यो व्यवस्था लागू गर्नुपर्नेछ । 

प्रधानमन्त्री तथा मन्त्रिपरिषद् कार्यालयका शासकीय मामिला सचिव चूडामणि पौडेल संयोजकत्वको समितिले तयार गरेको आर्थिक सुधार कार्ययोजना तयार गरेको थियो ।जेठ ६ गते बसेको मन्त्रिपरिषद् बैठकले आर्थिक सुधार सुझाव आयोगको सिफारिस कार्यान्वयन गर्ने निर्णय गरेको थियो ।