तेस्रो दिन पनि गाजामा हवाई आक्रमण, २० जनाको मृत्यु

गाजापट्टी । इजरायलले शुक्रबार बिहान फेरि एक पटक गाजामा शक्तिशाली र घातक हवाई आक्रमण गरेको छ। हवाई आक्रमणमा कम्तीमा २० जनाको मृत्यु भएको छ । अरू धेरै जना घाइते भएका छन् ।

मिडिया रिपोर्टका अनुसार त्यहाँ उपस्थित एक पत्रकारले इन्डोनेसियाली अस्पतालमा २० जनाको शव गणना गरिएको पुष्टि गरेका छन् । अर्कोतर्फ घाइते र उद्धारकर्मीहरूको भनाइ उद्धृत गर्दै धेरै मानिसहरू भग्नावशेषमुनि दबिएको बताइएको छ ।

इजरायलले पछिल्ला दिन गाजामा निरन्तर आक्रमण गरिरहेको छ। अमेरिकी राष्ट्रपति डोनाल्ड ट्रम्प मध्यपूर्वको भ्रमणमा रहकै बेला आक्रमण भएका छन् । राष्ट्रपति ट्रम्पले इजरायल र हमासबिच युद्धविराम गराउन धेरै महत्त्वपूर्ण प्रयासहरू पनि गरेका छन्।

यद्यपि, अर्कोतर्फ यसहप्ता अमेरिकी समर्थित नयाँ संस्था ‘गाजा मानवीय फाउन्डेसन’ ले महिनाको अन्त्यसम्ममा गाजामा राहत कार्य सुरु गर्न सक्ने घोषणा गरेको छ । यसमा अमेरिकी सैन्य भेटरान, सुरक्षा विज्ञ र पूर्व राहत संयोजकहरू समावेश हुनेछन्।

लगातार तेस्रो दिन घातक हवाई हमला

इजरायल र हमासबिच जारी द्वन्द्वका बेला इजरायलले गाजामा घातक हवाई आक्रमण गरेको यो लगातार तेस्रो दिन हो । यसअघि बिहीबार इजरायलले दक्षिणी गाजाको खान युनिस सहरमा हवाई आक्रमण गर्दा ५४ जनाको मृत्यु भएको थियो भने धेरै जना घाइते भएका थिए।

बुधबार उत्तरी र दक्षिणी गाजामा भएका आक्रमणहरूमा कम्तीमा ७० जनाको मृत्यु भएको थियो, जसमा करिब दुई दर्जन बालबालिका पनि थिए।