सगरमाथा संवाद कार्यक्रमलाई प्रभावकारी बनाउन प्रधानमन्त्रीले थाले छलफल

काठमाडौं । प्रधानमन्त्री केपी शर्मा ओलीले आगामी जेठमा हुने सगरमाथा संवाद कार्यक्रमलाई विशेष बनाउन छलफललाई अघि बढाएका छन् । प्रधानमन्त्री ओलीले बुधबार निर्देशक समितिको पहिलो बैठक राखेर यसबारे छलफल अघि बढाएका हुन् ।

प्रधानमन्त्री तथा मन्त्रिपरिषद् कार्यालयमा भएको बैठकमा कार्यक्रम व्यवस्थापन, कार्यक्रमको रूपरेखा, विदेशी राष्ट्रप्रमुख तथा सरकार प्रमुखसहित अतिथिहरूको निमन्त्रणा, विज्ञहरूको सहभागिता लगायत विषयमा छलफल भएको प्रधानमन्त्रीको सचिवालयले जनाएको छ ।

बैठकमा प्रधानमन्त्री ओलीले सबै क्षेत्रको सहयोग र सहभागितामा कार्यक्रमलाई विशेष बनाउन सहभागीहरूलाई आग्रह गरेका छन् । सगरमाथा संवाद कार्यक्रम सञ्चालन गर्न प्रधानमन्त्री तथा मन्त्रिपरिषद् कार्यालयमा सचिवालय समेत सञ्चालनमा आइसकेको छ ।

प्रधानमन्त्री ओलीको अध्यक्षतामा निर्देशक समिति र परराष्ट्रमन्त्री डा. आरजु राणा देउवाको अध्यक्षता र वन तथा वातावरण मन्त्री ऐनबहादुर शाही ठकुरीको सहअध्यक्षतामा व्यवस्थापन समिति पनि गठन गरिएको छ ।

सरकारले संवाद कार्यक्रमका लागि छिमेकी मुलुक भारत, चीनसहित विभिन्न मुलुकका राष्ट्रप्रमुख र सरकार प्रमुखसहितलाई विशेष अतिथिका रूपमा आमन्त्रण गरिसकेको छ ।

सरकारले पहिलो पटक जलवायु परिवर्तन, हिमाल र मानव जीवनको भविष्यलाई केन्द्रमा राखेर हरेक दुई वर्षमा यस प्रकारको विश्वव्यापी संवाद आयोजना गर्न लागेको हो ।