दोस्रो पटक माओवादीको अभियानको कार्यतालिका हेरफेर

काठमाडौ । नेकपा माओवादी केन्द्रले दोस्रो पटक ‘जनतासँग माओवादीः तराई–मधेस जागरण अभियान’ सम्बन्धी कार्य तालिका हेरफेर गरेको छ । 

पार्टी महासचिव देव गुरुङ पार्टीको आन्तरिक विषय मिलाउन कार्यतालिका सामान्य हेरफेर गरिएको बताए । उनका अनुसार महोत्तरीदेखिका कार्यक्रमको समय तालिका परिवर्तन गरिएको हो । 

स्थानीय पर्व तथा पार्टीका विभिन्न जनसंगठनका भेला लगायतका अन्य कार्यक्रम परेका कारण अभियानको कार्यतालिका संशोधन गरिएको उनको भनाइ छ । 

संशोधित कार्यकालिका अनुसार महोत्तरीमा फागुन २२ गते अभियान भएर सर्लाहीमा फागुन २३, रौतहट– फागुन २४, बारामा फागुन २५, पर्सामा फागुन २६, चितवनमा फागुन २७ गते अभियान सञ्चालन हुनेछ । यस्तै मगर मोर्चाको उद्घाटन बुटवलमा फागुन२८ हुने छ भने त्यसपछि नवलपुर (नवलपरासी पूर्व) मा चैत्र २, परासी (नवलपरासी पश्चिम)मा चैत्र ३, रुपन्देहीमा चैत्र ४, कपिलवस्तुमा चैत्र ५, दाङमा चैत्र ६, बाँकेमा चैत्र ७ र बर्दियामा चैत्र ८ गते अभियान सञ्चालन हुनेछ । 

चैत ९ गते समाजवादी मोर्चाको जनकपुरमा जनसभा हुने तय भएकाले सो दिन अभियान सञ्चालन हुनेछैन ।

यसैगरी कैलालीमा चैत्र ११ गते र कञ्चनपुरमा चैत्र १२ अभियान सञ्चालन भएर सकिनेछ । अब १२ गतेमात्रै सकिने भएको माओवादीको भनाइ छ । यसअघि चैत ७ मै सकिने भनिएको थियो । माओवादीको फागुन १२ देखि अभियान हुँदै आएको छ ।