६ वटा मुद्दाका अभियुक्त देउला सुनका गरगहना चोरेको आरोपमा फेरि पक्राउ​

काठमाडौं। डल्लुमा एक घरबाट सुनका गरगहना चोरी भएको घटनाको अनुसन्धानका क्रममा ६ वटा मुद्दा चलेका व्यक्तिलाई प्रहरीले पक्राउ गरेको छ । पक्राउ पर्नेमा काठमाडौं वसन्तपुर बस्ने नरेन्द्र देउला छन् ।डल्लुमा बस्दै आएकी दोलखा सैलुङकी सुनिता ठकुरीको डेराबाट गत आइतबार सुनका गरगहना र नगद चोरी भएको थियो ।

प्रहरी वृत्त स्वयम्भूले अनुसन्धानका क्रममा चोरी गर्ने देउला, वसन्तपुरकै कमलबहादुर कार्की र खरिद गर्ने भारत कलकत्ताका जागिर मालिकलाई पक्राउ गरेको छ ।

ठकुरीको घरबाट देउला र कार्कीले सुनको नेकलेस, सिक्री, औँठी तिलहरीलगायतका गरी २३ लाख बराबरको गरगहना चोरी गरेका थिए ।उनीहरूले चोरी गरेका गरगहना भारतीय नागरिक मालिकलाई बिक्री गरेका थिए । 

जिल्ला प्रहरी परिसर काठमाडौंका प्रवक्ता एसपी अपिलराज बोहराका अनुसार पक्राउ परेका मध्ये देउला यस अघि चोरी, ज्यान मार्ने उद्योग लगायत ६ वटा मुद्दामा पक्राउ परेर छुटेका पटके अभियुक्त हुन् ।

उनीहरूलाई चोरी मुद्दामा अनुसन्धान गर्न जिल्ला अदालत काठमाडौंबाट पाँच दिनको म्याद थप भएर अनुसन्धान भइरहेको ​बोहराले जानकारी दिए ।