मतपत्रमा पानी खन्याएपछि मधेस प्रदेशको मतगणना स्थगित

काठमाडौँ । अनेरास्ववियु क्रान्तिकारीको मधेस प्रदेशमा जारी मतगणना विवादका कारण रोकिएको छ । एक सय ५४ मत गणना हुँदा चार मत कम देखिएपछि विवाद भएको एक विद्यार्थी नेताले जानकारी दिए ।

विवादकै क्रममा अध्यक्षका उम्मेदवार विजय शर्मा सापकोटा पक्षधरले मतपत्रमा पानी खन्याएपछि मतगणना स्थगित भएको ती नेताले जानकारी दिए । मधेस प्रदेशमा अध्यक्षका उम्मेदवार उपदेश यादवले सबैभन्दा बढी ६७ मत ल्याएका छन् ।

हेमन्त राईले ४१, सापकोटाले ४० र सुदिन पौडेलले एक मत पाएका छन् । ती नेताका अनुसार एक मत बदर भएको छ ।अहिले दुवै पक्षले पुनः निर्वाचन हुनुपर्ने माग गरेका छन् । ‘मत गणना हुँदा चार मत कम देखियो ।

विवाद हुँदा महासचिवका उम्मेदवार सञ्जय महतोको समूहले पानी खनाएपछि मतगणना स्थगित भएको छ । निर्वाचन समितिले अहिले सिलबन्दी गरेर राखेको छ । दुवै पक्षले फेरी चुनाव हुनुपर्छ भनेका छन्’,  ती नेताले बताए ।