दाङ । दाङको गढवा गाउँपालिकाको न्यायिक समितिमा हालसम्ममा कूल ९५ उजुरी दर्ता भएका छन् । न्यायिक समितिका सदस्य कमला नेपालीले गत असारसम्म ८२ वटा र साउनदेखि कात्तिक ६ गतेसम्म १३ वटा गरी जम्मा ९५ वटा विवाद आएका बताउनुभयो ।
समितिका सदस्य नेपालीका अनुसार न्यायिक समितिमा आएका विवादमध्ये ६५ वटा विवाद मिलाइसकेको छ भने चार वटालाई अदालत जान सल्लाह दिएको र अन्य मुद्दा छलफलको प्रक्रियामा रहेका छन् ।
_20231127105311.gif)
गाउँपालिकाका न्यायिक समितिका संयोजक शान्ति चौधरीले समितिमा आउने मुद्दामा जग्गा विवाद, लेनदेन, घरायसी झैझगडा, कुलोपानी, खेतीपाती नोक्सानी, विदेश पठाउने नाममा ठगी र सम्बन्धबिच्छेद रहेका छन् ।
सामान्य विवाद भए पनि नागरिक न्यायिक समितिमा उजुरी लिएर गाउँपालिका आउँछन्, हामीलाई मुद्दा मिलाउन भ्याइनभ्याइ हुने गरेको छ, मुद्दा मिलाउनमै व्यस्त रहनुपर्दा अन्य काम कतिबेला गर्ने भन्ने समस्या हुने गरेको छ गढवा गाउँपालिका न्यायिक समितिका संयोजक तथा उपाध्यक्ष शान्ति चौधरीले भन्नुभयो ।
न्यायिक समितिका पदाधिकारीले आफूहरुलाई कानूनको बारेमा प्रशिक्षणको अभाव रहेको बताएका छन् ।
स्थानीय तहको उपप्रमुख तथा उपाध्यक्षलाई न्यायिक समितिको संयोजकको जिम्मेवारी तोकिएको छ । मुलुकमा गत भदौदेखि नयाँ कानून आएको छ, कानूनको बारेमा अलि कति पनि प्रशिक्षित नगराई न्यायिक समितिमा बसेर काम गर्नुपर्दा आफूहरुलाई निकै कठिनाइ भएको उनीहरु बताउँछन् ।
त्यसका लागि न्यायिक समितिका संयोजक र सदस्यलाई सरकारले कानूनको बारेमा न्यूनतम भए पनि तालीम दिएर प्रशिक्षित गराएमा उजुरी मिलाउन सहज हुने न्यायिक समितिका पदाधिकारीको धारणा छ । (रासस)
प्रतिक्रिया दिनुहोस