चार महिनामै ४ अर्ब ८२ करोडको बीमा पोलिसी सरेण्डर

काठमाडौं । चालू आर्थिक वर्षको चार महिनामा ४ अर्ब रुपैयाँभन्दा बढीको बीमा पोलिसी सरेण्डर भएको छ । नेपाल बीमा प्राधिकरणको तथ्यांक अनुसार चालू आवको साउनदेखि कात्तिक मसान्तसम्ममा ४ अर्ब ८२ करोड ९७ लाख रुपैयाँ बराबरको बीमा पोलिसी सरेण्डर भएको हो । जुन ३५ हजार ९८५ वटा पोलिसी वापतको हो ।

यस अवधिमा लाइफ इन्स्योरेन्स कर्पोरेशन (नेपाल) लिमिटेडको सबैभन्दा धेरै पोलिसी सरेण्डर भएको छ । यस कम्पनीको १० हजार ४८ वटा पोलिसी बापतको एक अर्ब ५७ करोड ६६ लाख रुपैयाँ बराबरको पोलिसी सरेण्डर भएको छ ।

सर्वाधिक पोलिसी सरेण्डर हुने कम्पनीहरूको दोस्रोमा नेपाल लाइफ इन्स्योरेन्स कम्पनी रहेको छ । यस कम्पनीको ८ हजार ४०८ वटा पोलिसी बापतको एक अर्ब ३७ करोड ४० लाख रुपैयाँ बराबरको सरेण्डर भएको छ ।

प्राधिकरणको अनुसार चालू आवको चार महिनामा राष्ट्रिय जीवन बीमा कम्पनीको ३७ करोड ४१ लाख रुपैयाँ बराबरको पोलिसी सरेण्डर हुँदा नेशनल लाइफ इन्स्योरेन्सको २९ करोड ३१ लाख रुपैयाँको सरेण्डर भएको छ । यसका साथै एशियन लाइफ इन्स्योरेन्स कम्पनीको २७ करोड ९६ लाख रुपैयाँ बराबरको पोलिसी सरेण्डर भएको छ ।

त्यस्तै, यस अवधिमा हिमालयन लाइफ इन्स्योरेन्स कम्पनीको २२ करोड ७४ लाख, सुर्यज्योती लाइफ इन्स्योरेन्स कम्पनीको २३ करोड ११ लाख, मेट लाइफको १३ करोड ५३ लाख, सानिमा रिलायन्स लाइफ इन्स्योरेन्स कम्पनीको ९ करोड ३१ लाख र आईएमई लाइफ इन्स्योरेन्स कम्पनीको ६ करोड ५४ लाख रुपैयाँ बराबरको बीमा पोलिसी सरेण्डर भएको छ ।

सिटिजन लाइफ इन्स्योरेन्स कम्पनीको ६ करोड ५२ लाख बराबरको पोलिसी सरेण्डर हुँदा प्रभु महालक्ष्मी लाइफ इन्स्योरेन्स कम्पनीको ५ करोड ५९ लाख बराबरको सरेण्डर भएको छ ।

यस अवधिमा रिलायबल नेपाल लाइफ इन्स्योरेन्स कम्पनीको ३ करोड ६३ लाख र सन नेपाल लाइफ इन्स्योरेन्स कम्पनीको २ करोड २९ लाख रुपैयाँ बराबरको बीमा पोलिसी सरेण्डर भएको छ ।