देशको अवस्था कहालीलाग्दो छ, सरकार अल्मलियो: शेखर कोइराला

काठमाडौ । नेपाली कांग्रेसका नेता डा. शेखर कोइरालाले देशको स्थिति निकै नाजुक रहेको टिप्पणी गरेका छन् । शनिबार चितवन काठमाडौं प्रजातान्त्रिक संगमको १२औं अधिवेशनलाई सम्बोधन गर्दै डा. कोइरालाले देश कहालीलाग्दो अवस्थामा पुगेको बताएका हुन् । 

यसतर्फ राज्यले ध्यान पुर्‍याउन नसकेको उनले बताए । 'देशको राजनीनीतिक परिस्थिति धेरै नै नाजुक छ । आर्थिक, सामाजिक र धार्मिक अवस्था अस्तव्यस्त छ । जताततै अराजकता छ,' उनले भने, 'देशको आर्थिक अवस्था कहालीलाग्दो छ । ऋण लिएर कर्मचारीलाई तलब खुवाउनुपर्ने अवस्था आइसक्यो । उत्पादन केही छैन । किन सकिरहेका छैनौं ? राज्यले ध्यान पुर्‍याउन सकेको छैन । सरकार अल्मलिएको छ ।'

कांग्रेस परिवर्तन नभई देश परिवर्तन हुन नसक्ने उनले बताए । 'जताततै अराजकता छ । जतासुकै भ्रष्टाचारबाहेक केही कुरा सुनिँदैन,' उनले भने, 'त्यसलाई सम्हाल्ने कसले ? त्यसका लागि लोकतान्त्रिक पार्टी चाहिन्छ । कांग्रेसबाहेक अर्को लोकतान्त्रिक पार्टी छैन । कांग्रेस परिवर्तन नभई देश परिवर्तन हुँदैन । हामी एक्लै चुनाव लड्न डराउँछौं । जबसम्म हामी एक्लै चुनाव लड्ने आट गर्दैनौं तबसम्म हामी झन् कमजोर हुँदे जान्छौं ।'