उर्लाबारीमा टिपरको ठक्करबाट डाक्टरको मृत्यु

विराटनगर। मोटरसाइकल दुर्घटनामा परी कनकाई हस्पिटल विर्तामोडका २८ वर्षीय चिकित्सक नीरज यादवको मृत्यु भएको छ ।जिल्ला प्रहरी कार्यालय मोरङका अनुसार आज बिहान पूर्व–पश्चिम राजमार्गअन्तर्गत मोरङको उर्लाबारीमा टिपरको ठक्करबाट उनको मृत्यु भएको हो ।

डा. यादव सवार प्र १–०२–०५२ प ४२४१ नं को मोटरसाइकललाई प्र–३–००१ क ००९५ नं को टिपरले ठक्कर दिँदा उनी घाइते भएपछि मङ्गलबारेस्थित मदन भण्डारी अस्पताल लगिएको थियो । उनको उपचारकै क्रममा मृत्यु भएको प्रहरीले जनाएको छ । ​

ठक्कर दिने टिपर र चालक मेचीनगर नगरपालिका–११ का ४४ वर्षीय वीरबहादुर शेर्पालाई प्रहरीले नियन्त्रणमा लिएको छ। एमबीबीएस डा. यादव कनकाई हस्पिटलको इमर्जेन्सीमा कार्यरत थिए । ड्युटीमा जाने क्रममा उनी दुर्घटनामा परेका हुन् ।