गठबन्धन सरकारबाटै संविधानको उल्लङ्घन भयो : नेता खनाल

काठमाडौँ । नेकपा एकीकृत समाजवादी पार्टीका सम्मानित नेता झलनाथ खनालले गठबन्धन सरकारबाटै बारम्बार संविधानको उल्लङ्घन भएकोले त्यसप्रति नेकपा एसले स्पष्ट धारणा राख्नुपर्ने बताएका छन् ।

संविधानको रक्षा गर्न बनेको गठबन्धनबाटै संविधानको उल्लङ्घन भइरहेको बताएका खनालले त्यसमा सरकारमा सहभागी भएको आधारमा गलत कामको सिकार पार्टी बन्न नहुने बताए ।

हाम्रो पार्टीले कस्तो धारणा राख्ने यो सवालमा पार्टी क्लियर हुनुपर्छ । हामी गठबन्धनको नाउँमा उनीहरूले गरेका गलत कामको सिकार हुनुहुदैन् ’ खनालले भने ।

शनिबार नेकपा एकीकृत समाजवादी पार्टी (नेकपा एस) को दोस्रो पार्टी पुनर्गठन दिवस पारेर आयोजित कार्यक्रममा सम्मानित नेता खनालले देशको समसामयिक सामाजिक,आर्थिक र राजनीतिक अवस्थाबारे चिन्ता प्रकट गरे ।

उनले भने,‘संविधानको रक्षा गर्न बनेको जुन गठबन्धन छ,त्यसैले नै संविधानको उल्लङ्घन गरेको छ । कोशीमा मात्रै हेर्नुन दुई चोटी संविधानको उल्लङ्घन भयो भनेर सर्वोच्च अदालतले फैसला दिएको छ ।’

उनले उक्त विषयमा नेकपा एसको धारणा स्पष्ट हुनुपर्ने पनि बताए ।

त्यस्तै नेता खनालले जनताको दैनदिनको समस्यासँग एकाकार भएर पार्टीलाई जनसङ्घर्षसँग जोडेर वर्गसंघर्षलाई अगाडि बढाउनुपर्ने धारणा पनि राखे । उनले नेकपा एसका सबै कमिटीलाई तल्लो तहबाटै एकीकृत गरेर दृढतापूर्वक अगाडि बढाउनुपर्नेमा जोड दिए ।