एसियाकप आजबाट सुरु हुँदै, पहिलो खेलमा श्रीलंका र अफगानिस्तान भिड्दै

काठमाडौं । आजबाट एसियाकप टी-२० क्रिकेट प्रतियोगिता सुरु हुँदै छ। युएईको दुबईमा सुरु हुने प्रतियोगिताको पहिलो खेलमा श्रीलंकाले अफगानिस्तानको सामना गर्दै छ। समूह ‘बी’ अन्तर्गत हुने पहिलो खेल साँझ ७:४५ मा सुरु हुने छ।

हरेक चार वर्षमा आयोजना हुने प्रतियोगिता दोस्रो पटक टी-२० फर्म्याटमा आयोजना हुन लागेको हो। यसअघि २०१६ मा टी-२० विश्वकपलाई ध्यानमा राख्दै पहिलो पटक एसियाकप टी-२० फर्म्याटमा गरिएको थियो।

यो वर्ष पनि अस्ट्रेलियामा हुने टी-२० विश्वकपलाई ध्यानमा राख्दै एसियाकप टी-२० फर्म्याटमा गर्न लागिएको हो। प्रतियोगितामा कुल ६ टिमलाई २ समूहमा विभाजन गरेर खेलाउन लागिएको छ। समूह १ मा भारत, पाकिस्तान र हङकङ रहँदा समूह २ मा श्रीलंका, अफगानिस्तान र बंगलादेश रहेका छन्।

श्रीलंकाले पछिल्ला पाँच खेलमा १ मा मात्र जित निकाल्दा पछिल्ला ४ खेलमा लगातार पराजित भएको छ। अफगानिस्तानले भने पाँच मध्ये दुई खेलमा जित र तीनमा हार भोगेको छ।

तर यी दुई टिमबीच भने एक अर्काविरुद्ध केवल एकपटक मात्र प्रतिस्पर्धा भएको छ। २०१६ को एसियाकपमा भएको प्रतिस्पर्धामा श्रीलंकाले जित निकालेको थियो।