सभापतिबाट ब्याक हुन्नँ, नोमिनेसन गर्ने तयारीमा जुटेको छु : प्रकाशमान सिंह

काठमाडौं । नेपाली कांग्रेसका नेता प्रकाशमान सिंहले सभापतिको दाबीबाट आफू ब्याक नहुने बताएका छन् । १४औं महाधिवेशनमा सभापतिका प्रत्यासीमध्येका एक सिंहले सहमतिका लागि पटकपटक छलफल गरेपनि कसैले कसैलाई नछाड्ने भएपछि निर्णयका लागि महाधिवेशन प्रतिनिको बीचमा जाने बताएका छन् ।

कांग्रेस संस्थापन इतरबाट वरिष्ठ नेता रामचन्द्र पौडेल, नेता शेखर कोइराला र सिंह सभापतिको दाबेदार छन् । ‘वान टू वान छलफलमा पनि कसैले कसैलाई नछाड्ने भनेपछि मैले ठीक छ प्रतिनिधिमाझ नै जाउँ भनेको छु’ उनले भने । 

संस्थापनइतरबाट साझा उम्मेदवार खोज्न तपाईं बाधक भयो भन्न थाले नि त भन्ने जिज्ञासामा सिंहले भने, ‘उहाँहरूले भनेअनुसार म चल्दा चाहिँ सहमति भएको हुने । मलाई न्याय दिनुस् भन्दा चाहिँ म सहमतिअनुसार नचलेको भन्ने यो कुरा त होइन नि ।’

आफूले १३औं महाधिवेशनमा पनि दाबी छाडेको भन्दै सिंहले यसपाली आफू सभापतिका लागि नोमिनेसन गर्ने तयारीमा जुटिसकेको बताए ।