एकै दिन बुद्ध एयरका दुई जहाजमा समस्या

काठमाडौं । एकै दिन बुद्ध एयरका दुई जहाजमा समस्या देखिएको छ । सोमबार काठमाडौंबाट विराटनगरका लागि उडेको र काठमाडौंबाट पोखराका लागि उडेको जहाजमा समस्या देखिएको हो ।

विराटनगरका लागि उडेको ९एन–एएनआई कल साइनको जहाजको ल्यान्डिङ गेयर नखुल्दा र पोखराका लागि उडेको ९एन–एजेओ कल साइन भएको जहाजको ककपिटमा धुवाँ देखिएको थियो । यी दुवै जहाज १४ देखि २४ वर्ष पुरानो रहेको बताइएको छ । दुवै जहाज गन्तव्यमा नपुगी काठमाडौं नै फर्किएका थिए ।

जहाजमा प्राविधिक समस्या आएपछि काठमाडौंस्थित त्रिभुवन अन्तर्राष्ट्रिय विमानस्थलमा आकस्मिक अवतरण गरिएको थियो । तर, आकस्मिक अवतरण गरिए पनि दुवै जहाजमा सवार चालक दलका सदस्य र यात्रु सकुशल रहेका छन् । नेपाल समाचारपत्रमा खबर छ ।