चिनियाँ राष्ट्रपति, प्रधानमन्त्री र महासचिवद्वारा शुभकामना

काठमाडौँ । नेपालको संविधान तथा राष्ट्रिय दिवसका अवसरमा चीनका राष्ट्रपति सी चीनफिङ, प्रधानमन्त्री ली खछ्याङ र संयुक्त राष्ट्रसङ्घका महासचिव एन्टोनियो गुटरेसले नेपाल र नेपालीको समृद्धिको कामना गर्दै शुभकामना व्यक्त गरेका छन् । 

चिनियाँ राष्ट्रपति र महासचिव गुटरेशले राष्ट्रपति विद्यादेवी भण्डारीलाई बेग्लाबेग्लै शुभकामना सन्देश पठाएर राष्ट्रिय दिवसको शुभकामना व्यक्त गर्नुभएको हो भने चीनका प्रधानमन्त्री लीले प्रधानमन्त्री शेरबहादुर देउवालाई सन्देश पठाएर हार्दिक शुभेच्छा व्यक्त गरेका हुन् । 

चीन सरकार र जनताका तर्फबाट पठाउनुभएको सन्देशमा राष्ट्रपति सीले विकास र समृद्धिका निम्ति चीन र नेपालबीचको रणनीतिक साझेदारी र सहयोगको सम्बन्ध अनन्तकालसम्म रहिरहने विशिष्ट प्रकृतिको छ भन्दै एकअर्काका हित प्रवद्र्धनमा दृढताका साथ सहयोग भइरहेको बताएका छन् ।  

गतवर्षदेखि चिनियाँ र नेपाली जनता संयुक्तरूपमा कोभिड–१९ महामारीविरुद्ध लडिरहेका तथा परम्परागत चीन–नेपाल मैत्रीलाई ‘बेल्ट एण्ड रोड’ सहयोगको माध्यमबाट उनीहरूले त्यसलाई नयाँ गति दिएका बताएका छन् । 

चीन र नेपालबीचको सम्बन्धलाई अझ उन्नत तुल्याउन आफूले उच्च महत्व दिएको उल्लेख गर्दै चिनियाँ राष्ट्रपतिले सन्देशमा दुवै देश र जनताको अझ अधिक हित तथा द्विपक्षीय सम्बन्ध प्रवद्र्धन गर्दै त्यसलाई नवीन चरणमा पु¥याउन राष्ट्रपति भण्डारीसँग सहकार्य गर्न आफू तत्पर रहेको बताए । 

यसैगरी महासचिव गुटरेसले अहिलेको कठिन परिस्थितिमा हरेक देशले विश्वको कल्याणका खातिर आवश्यक योगदान गर्नुपर्ने स्मरण गराएको बताउँदै महामारीबाट पार पाउन सहकार्य गरिरहँदा त्यसलाई परास्त गरेपछि अझ उत्थानशील, दिगो र न्यायपूर्ण समाज निर्माण गर्नुपर्नेमा जोड दिए । 

जलवायु परिवर्तनका दुष्प्रभाव र त्यसले निम्त्याउने सङ्कटको सम्बोधनका साथै दिगो विकासका लक्ष्य हासिल गर्ने प्रयासलाई दृढताका साथ अघि बढाउन आवश्यक भएको उहाँले सन्देशमा उल्लेख गरे। 

संयुक्त राष्ट्रसङ्घलाई सुदृढ तुल्याउँदै सबैका लागि अझ योग्य र शान्त संसार निर्माण गर्न नेपालबाट सहयोग हुने भरोसा आफूले गरेको महासचिव गुटरेसले बताए ।