उत्तर कोरियालाई खोप उपलब्ध गराउन रुसको प्रस्ताव

रुसले फेरि पनि उत्तर कोरियालाई कोरोना भाइरसविरुद्धको खोप उपलब्ध गराउने प्रस्ताव गरेको छ। कोरोना भाइरसको संक्रमण फैलिन नदिने उद्देश्यसहित लागु गरिएको कडा लकडाउनका कारण उत्तर कोरियामा गम्भीर भोकमरीको अवस्था आएको भन्ने खबरपछि रुसले पुनः एकपटक खोपको प्रस्ताव गरेको हो।

उत्तर कोरियाले लगातार रुससहितका देशले गरेको खोप दिने प्रस्ताव अस्वीकार गर्दै आएको छ। रुसका विदेश मन्त्री सर्गेइ लाभरोभले उत्तर कोरियालाई बुधबार फेरि खोप दिने प्रस्ताव गरिएको बताएका हुन्। उनले यसअघि विभिन्न पटक गरिएको यस्तो प्रस्ताव उत्तर कोरियाले अस्वीकार गरेको पनि उल्लेख गरेका छन्।

संक्रमण फैलिन नदिन भन्दै लागु भएको लकडाउन तथा सीमा बन्दका कारण उत्तर कोरियाको चीनसँगको व्यापार गम्भीर रुपमा प्रभावित भएको छ। खाद्यान्न, मल तथा उर्जाका लागि उत्तर कोरिया अधिकांश रुपमा चीनसँग निर्भर रहेको छ।

हालैका दिनमा उत्तर कोरियाका नेता किम जोङ–उनले देशमा गम्भीर खाद्यय संकट उत्पन्न भएको स्वीकार गरेका छन्। उनले अवस्थालाई तनावपूर्ण पनि भनेका छन्।कोरोना भाइरसका कारण बन्द गरिएको सीमासँगै परमाणु कार्यक्रमका कारण लागेको अन्तर्राष्ट्रिय प्रतिबन्धले पनि उत्तर कोरियाको खाद्य संकट बढाउन सहयोग गरेको छ।