प्रधानमन्त्रीको व्यङ्ग्य ‘केही व्यक्ति सपनामा पनि चुनाव सरेको देख्छन्’

नेपाली काँग्रेसका सभापति एवं प्रधानमन्त्री शेरबहादुर देउवाले कर्णालीलगायत विकट र दुर्गम क्षेत्रको विकासलाई अब कसैले रोक्न नसक्ने बताउनुभएको छ । बिहीबार कालीकोट, रोल्पा, रुकुम लगायतका जिल्लामा सुरक्षा अवस्था बुझ्न र स्थानीय बासिन्दासित भेटघाट गर्न पुग्नुभएका प्रधानमन्त्री देउवाले विकट क्षेत्रले अब रोग, भोक र शोकमा होइन; पूर्वाधार खडा भइसकेकाले आर्थिक विकास र समृद्धिमा अगाडि बढ्नुपर्ने बेला आएको बताउनुभएको छ ।

प्रधानमन्त्री देउवाको सचिवालयका अनुसार प्रधानमन्त्री देउवाले कालीकोटका नरहरिनाथ गाउँपालिकाको कोटवाडा, रुकुमको तक्सेरा लगायतका कार्यक्रममा संविधान निर्माण भइसकेकाले मुलुकको सम्पूर्ण ध्यान आर्थिक विकास नै भएको स्पष्ट गर्नुभयो ।
प्रधानमन्त्री देउवाले सुदूरपश्चिम र मध्यपश्चिमसँगको सुसम्बन्धबाट विकट जिल्लाको विकास गर्न सकिने बताउनुभयोे । उहाँले यस क्षेत्रमा रहेको भूसम्पदा, जलस्रोत, रमणीय भूभागका कारण पर्यटन क्षेत्रको प्रवद्र्धन र विकास गर्न सकिने बताउनुभयो । उहाँले प्राकृतिक स्रोत र साधनको प्रयोगबाट समुन्नत प्रदेश बनाउने योजना पनि सुनाउनुभयो ।

प्रधानमन्त्री देउवाले सडक सञ्जालको विस्तार, जडीबुटी प्रशोधन, जलविद्युत्को विकास र सिँचाइ सुविधा अझ विस्तार गरी स्थानीयस्तरमा रोजगारी सिर्जना गर्न सकिने विश्वास दिलाउनुभयो ।

यसैबीच रोल्पा समाचारदाता लोकेन्द्र चन्दका अनुसार लोकतन्त्रको संस्थागत विकास नै अबको देशको प्रमुख कार्यसूची भएको स्पष्ट गर्नुभएको छ । रोल्पाको लिवाङमा आयोजित लोकतान्त्रिक गठबन्धनको चुनावी सभालाई सम्बोधन गर्नुुहुँदै काँग्रेसका सभापतिसमेत रहनुभएका प्रधानमन्त्री देउवाले द्वन्द्वका बेला सबैभन्दा धेरै मानिसले ज्यान गुमाउनु परेको स्मरण गर्दै काँग्रेसले नै शान्तिप्रक्रियाको नेतृत्व गरी मुलुकलाई नयाँ युगमा प्रवेश गराएको बताउनुभयो ।

“नेपाली जनताले अब डर र त्रासमा बाँच्नुपर्ने दिन गए, लोकतन्त्र जनताको शासन हो” भन्नुहुँदै प्रधानमन्त्री देउवाले जनतालाई भ्रममा पार्ने खेल कसैले पनि गर्न नहुने बताउनुभयो ।

प्रधानमन्त्रीले देउवाले सरकार निर्वाचन गराउन रातदिन खटिरहे पनि कतिपय नेता भ्रम छर्न व्यस्त रहेकोप्रति आपत्ति प्रकट गर्नुभयो । आरोप लगाउनेले मङ्सिर १० र २१ गते भोट खसाएपछि पनि ‘शेरबहादुर देउवा’ले चुनाव सार्दैछ भन्न बेर लगाउँदैनन् भन्दै उहाँले व्यङ्ग्य गर्नुभयो, “केही व्यक्तिहरू सपनामा पनि चुनाव सारेको देख्छन् होला कि ?”

यसैगरी प्रधानमन्त्री देउवाले नेपालमा वाम गठबन्धनको सरकार भएमा कर्णालीको विकास नहुने दाबी गर्नुभएको छ । काँग्रेस कालीकोटले नरहरिनाथ गाउँपालिकाको कोटवाडामा आयोजना गरेको चुनावी आमसभालाई सम्बोधन गर्दै प्रधानमन्त्री देउवाले कर्णाली हरेक क्षेत्रमा पछि परे पनि काँग्रेसबाहेक अरू कसैको ध्यान नपुगेको बताउनुभयो । प्रधानमन्त्री देउवाले कर्णालीको भूसम्पदा तथा पर्यटन क्षेत्रको अथाह सम्भावना रहेकाले अबको विकास झन् सुदृढ गर्दै अघि बढ्ने ठोकुवासमेत गर्नुभएको छ । गोरखापत्रबाट