स्थायी समिति बैठक यत्तिकै टुङग्याउने प्रधानमन्त्री ओलीको दाउ

काठमाडौं । नेकपामा स्थायी समिति बैठक १० असारयता जारी छ । यो बैठक अहिले स्थगितको अवस्थामा छ । पार्टीभित्र विवादै विवादका चाङ उत्तिकै छ । सचिवालय, स्थायी समिति दुवै कमिटिले विवाद समाधानको सूत्र फेला पार्न सकिरहेको छैन् ।

यही बीच १५२ केन्द्रीय सदस्यले विवाद अब केन्द्रीय समितिमा गहन छलफल गरेर त्यहीबाट समाधानको खोजी गर्नु पर्ने भन्दै बैठकको माग गरेका छन् । ४४१ सदस्यीय केन्द्रीय समितिमा बैठक माग गर्ने यो संख्या झण्डै ३५ प्रतिशत सदस्य संख्या हो । नेकपाको पार्टी अन्तरिम विधानको धारा ५९ (क) ४  मा कुनै पनि कमिटिका २५ प्रतिशित सदस्यले लिखित रुपमा बैठक माग गर्न सक्ने ब्यवस्था छ । अरु कमिटिका १५ दिन र केन्द्रीय कमिटिको त्यसरी बैठक माग गरेको एक महिनाभित्र बैठक वोलाईसक्नुपर्ने विधानको ब्यवस्था छ । 

तर, ओली पक्ष पार्टी कमिटिको बैठक बोलाउने पक्षमै देखिएको छैन् । उपाध्यक्ष वामदेव गौतमले पार्टीभित्रको विग्रह तत्कालका लागि समाधान गर्न भन्दै ओलीलाई प्रतिनिधीसभाको बाँकी कार्यकाल सम्मै प्रधानमन्त्री र एकता महाधिवेशन सम्मै अध्यक्ष कायम गर्ने र प्रचण्डलाई भने सम्पूर्ण रुपमा कार्यकारी अधिकार दिएर जानुपर्ने सहितको ६ बुँदे प्रस्ताव अगाडी सारेपछि ओली पार्टीभित्रको आफ्नो संकटमा केही राहत मिलेको अनुभूति गर्न थालेका छन् ।त्यसकारण उनी बैठक बोलाउन परे सचिवालय बोलाउने तर जारी स्थायी समिति र केन्द्रीय समिति भने अहिले नबोलाउने पक्षमा देखिएका छन् ।

जारी स्थायी समिति बैठकलाई त ओलीले त्यसै कुनै निर्णय बिनै सिध्याउन चाहिरहेका छन् । त्यही कारण पनि उनले आफु पनि स्थायी समिति बैठक बालुवाटारमै बस्दा पनि नजाने, गएपनि एक्कैछिन बसेर हिडिहाल्ने गर्दै आईरहेका थिए । अहिले त उनी यो बैठक राख्नै चाहदैनन् । सकभर यो बैठक त्यक्तिकै थन्कोमन्को कसरी पार्न सकन्छि भन्ने मात्र उनको दाउ देखिएको छ । उनले अब स्थायी समिति कि कुरा मिले बस्छ, की अब बस्दैन, तपाईहरु जिल्लातिर गए हुन्छ भन्दै आफु निकटका स्थायी समिति सदस्यलाई काठमाडौं बाहिर पठाईसकेका छन् ।

गण्डकी र प्रदेश ५ का मुख्यमन्त्री दुवैलाई ओलीले अब आफनै काममा लाग्न गए हुन्छ भनी पठाएका छन् । अर्का स्थायी समिति सदस्य सत्यनारायण मण्डललाई जिल्ला गए हुन्छ भन्दै पठाएका छन् । ‘म त जिल्लातिर आएको छु, अब बैठक बस्ने ठेगान नै छैन्, किन काठमाडौं बस्नु भन्ने भयो, प्रधानमन्त्रीले पनि जिल्लातिरै गए हुन्छ अहिलेलाई, काठमाडौंमा बैठक बस्ने कुनै त्यस्तो सम्भावना छैन भन्नुभएको छ, म सर्लाहीतिर आएको छु,’–स्थायी समिति सदस्य सत्यनारायण मण्डलले सफलखबरसँग भने ।

गण्डकी प्रदेशका मुख्यमन्त्री पृथ्वीसुब्बा गुरुङले पनि अहिले अब बैठकको ठेगान नभएकोले आफु कार्यक्षेत्र फर्किएको बताए । ‘म पोखरा फर्किसकेको छु, अब सहमतिमा बैठकको वातावरण बने जान्छु, नत्र बैठक नै बस्दैन किन जाने ?’ मुख्यमन्त्री गुरुङले भने । ओलीले आफ्ना नेतालाई जिल्ला बाहिर पठाउनु, अध्यक्ष प्रचण्डसँग दुई दिन यता छलफलमा बस्न रुची नदेखाईरहनुले ओली बैठक टार्दै जान खोजेको देखिन्छ । उनी आफुले भनेका विषयमा सहमतिमा नआए सकभर पार्टी बैठकनै राख्न नचाहने गरी जान खोजेका देखिन्छन् ।