बेलायतका केही बालबालिकामा कोरोना संक्रमण पुष्टि, सचेतता अपनाउन चिकित्सकको आग्रह

एजेन्सी । बेलायतका चिकित्सकहरुले केही बालबालिकामा अति सामान्य लक्षण देखिएको र त्यसमध्ये केहीमा कोरोना भाइरसको संक्रमण पुष्टि भएकाले सचेत हुन आग्रह गरेका छन् । कोरोना संक्रमणको जोखिम फरक लक्षणसहित आउन सक्ने भन्दै बेलायतको राष्ट्रिय स्वास्थ्य सेवा अन्तर्गतका डाक्टरले त्यस्तो चेतावनी दिएका हुन् ।

गम्भीर बिरामी परेका बिरामीमा ‘मल्टी–सिस्टम इन्फ्लामेसन’ सहित फ्लूका लक्षणहरु देखिएको डाक्टरको भनाई छ । समध्ये केहीमा कोरोना भाइरसको संक्रमण पुष्टि भएकाले सचेत हुनु पर्ने उनीहरुले बताएका हुन् । यस्तो समस्या देखिने बालबालिकाको यकिन संख्या थाहा भएको छैन, तर संख्या कम रहेको भने बताइएको छ ।

पछिल्ला केही दिनदेखि मात्रै बालबालिकामा असामान्य लक्षण देखिने र उनीहरु गम्भीर बिरामी पर्ने गरेको रिपोर्ट आएको एनएचएस इंग्ल्याण्डका मेडिकल डिरेक्टर स्टिफन पोविसले बताएका छन् । यसबारे थप अनुसन्धान भइरहेको उनले बताए ।

समान उमेर समूहका बालबालिकामा उच्च ज्वरो, रक्तचाप कम, शरीरमा धब्बा तथा स्वासप्रस्वासमा समस्यासहितका समान लक्षण देखिएका हुन् । केहीमा पेट दुख्ने, वान्ता हुने वा झाडा लाग्नेसहितका लक्षण पनि देखिएका छन् । यसैगरी मुटु सुन्निनेसहितका लक्षण देखिएको डाक्टरले बताए ।