एजेन्सी । विश्वभर महामारी फैलाइरहेको कोरोना भाइरस (कोभिड १९) चीनको वुहान शहरमा देखा परेको सय दिन पुगेको छ । गतवर्ष डिसेम्बर अन्तिम साता पहिलोपटक मानिसमा देखा परेको कोरोना भाइरसको संक्रमण पछिल्ला दिनमा जटिल बन्दै गइरहेको छ ।
अमेरिकाका विभिन्न स्नायू विशेषज्ञका अनुसार अब कोरोना दिमागसम्म पनि पुगेको छ । ज्वरोपछि अब मस्तिष्क सुन्निने र टाउको दुख्ने घटना पनि तीब्र रुपमा बढिरहेका छन् ।
कोरोनाभाइरसको नयाँ क्षमतासँगै नयाँ जानकारी पनि सार्वजनिक भइरहेका छन् । उक्त नयाँ जानकारीका अनुसार बिरामीमा यो रोगको लक्षण तीब्र रुपमा बढिरहेको छ । गला, फोक्सो र दिमागपछि यसको असर पेटमा देखिएको छ । चीनबाट प्राप्त आँकडा अनुसार ५० प्रतिशत कोरोना बिरामीमा पेट दुख्ने, झाडा र बान्ताको लक्षण देखिएको छ ।
अमेरिकन जर्नल अफ ग्यास्ट्रोएन्ट्रोलोजीमा प्रकाशित अनुसन्धान अनुसार चीनको हुबेई प्रान्तमा कोरानाका २०४ बिरामीमा भएको अनुसन्धानमा यो पुष्टि भएको हो । साधारणतया कोरोना संक्रमित बिरामीमा ज्वरो, सास फेर्न समस्या, सुख्खा खोकीजस्ता लक्षण देखिन्छ । हालै गरिएको अनुसन्धानले गन्ध थाहा नपाउनु र स्वाद महसुस नहुनु पनि यसको लक्षण भएको बताएको थियो ।
पेटमा पीडा
लण्डनको बलहम शहर निवासी इस्ला हसलमले आफ्नो अनुभव द सनसँग साझा गरेकी छिन् । उनले भनिन्, ‘जब म कोरोनाभाइरसको संक्रमणसँग जुधिरहेकी थिएँ तब मलाई पेटमा भिन्न तरिकाको पीडा महसुस भयो । यो संक्रमणको पहिलो लक्षण थियो । एकदिन बिहान उठ्दा फुड पोइजनिङ भएको महसुस भयो । त्यसको केही घण्टापछि घाँटी सुन्निएको जस्तो भएर सास फेर्न गाह्रो भयो । रातीसम्म नाक पूर्ण रुपमा बन्द भइसकेको थियो, यो निकै डरलाग्दो अनुभव थियो । शरीरमा भारीपन महसुस भएको थियो र ज्वरो पनि बढिरहेको थियो ।’
सुघ्ने र स्वाद थाहा पाउने क्षमता प्रभावित
गन्ध थाहा नपाउनु र स्वाद महसुस नहुनु पनि कोरोनाभाइरस संक्रमणको सुरुवाती लक्षण हो । बेलायती रायनोलोजिकल सोसायटीका अध्यक्ष निर्मल कुमारका अनुसार दक्षिण कोरिया, चीन र इटलीमा कोरोना पीडितमा यो पुष्टि भएको हो ।
अनुसन्धानको रिपोर्ट अनुसार दक्षिण कोरियामा कोरोनाबाट पीडित ३० प्रतिशत मानिसहरुमा गन्ध थाहा नपाउनुलाई सबैभन्दा प्रमुख लक्षण थियो । ज्वरो, खोकी र सास लिन समस्याबाहेक यो पनि एउटा महत्वपूर्ण लक्षण हो जसले संक्रमण पहिचान गर्न मद्दत गर्न सक्छ । अमेरिकन एकेडेमी अफ ओटोलेरेन्गोलोजीले पनि हालै यस्तो रिपोर्ट जारी गरेको छ । अमेरिकन एकेडेमीको रिपोर्ट अनुसार यस्तो लक्षण देखिए ढिला नगरी डाक्टरको सल्लाह लिनुपर्छ ।
मस्तिष्क सुन्निने समस्या
कोरोनाभाइरसले गला र फोक्सोका साथै दिमागलाई पनि जकडिरहेको छ । धेरैजसो स्नायू विज्ञले यसको पुष्टि गरेका छन् । उनीहरुका अनुसार कोरोनाबाट पीडित बिरामीमध्ये एउटा तप्का यस्तो पनि छ कि जसमा संक्रमणको असर दिमागसम्म पुगिरहेको छ । विशेषज्ञले यसलाई ‘ब्रेन डिस्फङसन’ नाम दिएका छन् ।
संक्रमणको असर बिरामीको बोल्ने क्षमतामा पनि परिरहेको छ । मस्तिष्क सुन्निने समस्या देखिएपछि यसले समस्या झन् जटिल बनाएको विशेषज्ञ बताउँछन् ।
प्रतिक्रिया दिनुहोस
सम्बन्धित समाचारहरु
हावाबाट कोरोना फैलिएको विश्व स्वास्थ्य संगठनको स्विकारोक्ति
कोरोना भाइरसविरुद्धको खोप विसर्जन गरिँदै
नेपालमा कोभिडको नयाँ भेरियन्ट नभित्रिएको स्वास्थ्य मन्त्रालयको भनाइ
भारतको ११ राज्यमा फैलियो कोरोना भाइरसको नयाँ भेरियन्ट
भारतमा भेटियो कोरोनाको नयाँ भेरियन्ट
कोरोना भाइरसविरुद्धको ४० लाख मात्रा डोज खोप खेर जाँदै