देउवा–पौडेल आ–आफ्नै रणनीतिमा : बुढानिलकण्ठ र बोहोराटारमा नेताहरुको जमघट

काठमाडौं । प्रमुख प्रतिपक्ष काँग्रेसको केन्द्रीय समिति बैठक आज (बिहिबार) बस्दैछ । पार्टी कार्यालय सानेपामा बस्ने बैठकमा उपचुनावको समिक्षा, भातृ संस्था नेविसघंको नेतृत्व चयन देखि केन्द्रीय विभागहरुसम्म चयन एजेण्डामा छन् ।  तीन महिनाभित्र बनाउनु पर्ने केन्द्रीय विभाग सभापति देउवाले पार्टी सभापतिमा निर्वाचित भएको ४५ महिनासम्म पनि बनाउन सकेका थिएनन् । उनले आज बस्ने केन्द्रीय समिति बैठकवाट केन्द्रीय विभाग र नेविसंघको नेतृत्वका विषयमा टुंगो लगाउन खोजेका छन् ।

विभाग गठनका लागि देउवाले वरिष्ठ नेता रामचन्द्र पौडेल पक्षसँग आफनो पक्षका नेताहरुको नाम दिन आग्रह गरिरहेका छन् । तर यो समाचार तयार पार्दासम्म पौडेलले देउवालाई विभागमा राखिने आफु पक्षिय नेताहरुको नाम दिएका छैनन् । पौडेलले सिमिति एजेण्डामा मात्र भन्दा समग्र एजेण्डामा छलफल गरी प्याकेजमै पार्टीभित्रका सबै मुद्दामा सहमति खोजेका छन् ।

पौडेलले पार्टीको महाधिवेशन सहमतीका लागि ९ बुँदे प्रस्ताव एक महिना अगाडी नै सभापति देउवालाई बुझाएका थिए । तर देउवा पौडेल पक्षको माग अनुसार चल्ने पक्षमा छैन् । पौडेल पक्षले अड्काउन खोजेपनि अब उनले बहुमतकै आधारमा भएपनि निर्णय लिने तयारी गरेका छन् । देउवा पक्षले आफुहरुको सहमती नलिई पेलेरै अगाडी बढ्ने नीति बनाएपछि केन्द्रीय समितिको पूर्वसन्ध्यामा दुवै पक्षका नेताहरु आ–आफनो आन्तरिक तयारीमा जुटेका छन् ।

बिहानै देखि सभापति देउवा निवासमा देउवा पक्षिय पदाधिकारीहरुको जमघट शुरु भएको छ । उता रामचन्द्र्र पौडेल निवासमा पनि केन्द्रीय नेताहरु छलफलका लागि पुग्न थालेका छन् । जसका कारण काँग्रेसको यो केन्द्रीय समिति बैठकलाई चासोका साथ हेर्न थालिएको छ । बुधबार पनि देउवा निवास बुढानिलकण्ठमा देउवा पक्षिय नेताहरु र महामन्त्री डा. शसांक कोइराला निवासमा संस्थापन इतर पक्षका नेताहरुको जमघट र छलफल भएको थियो । दुवै पक्षले केन्द्रीय समितिमा कसरी आफुलाई प्रस्तुत गर्ने रणनीतिक योजना बुनेका छन् ।