Safal Khabar - सन्दीप लामिछानेको प्रत्येक विकेटमा क्रिकेट रंगशालालाई आर्थिक सहयोग
शुक्रबार, ०८ चैत २०७५ (Friday, 22 March, 2019)
सन्दीप लामिछानेको प्रत्येक विकेटमा क्रिकेट रंगशालालाई आर्थिक सहयोग
सफल खबर संवाददाता
बिहिबार, ३० फागुन २०७५, १९ : ०१
सन्दीप लामिछानेको प्रत्येक विकेटमा क्रिकेट रंगशालालाई आर्थिक सहयोग

चितवन । नेपाली क्रिकेटका चर्चित खेलाडी सन्दीप लामिछाने यतिबेला विभिन्न अन्तराष्ट्रिय खेलहरुमा व्यस्त रहेका छन् । अब यी चर्चित खेलाडीले अन्तराष्ट्रिय खेलहरुमा १ विकेट लिँदा क्रिकेट रंगशाला निर्माणको लागि ५ डलर सहयोग आउने भएको छ । यो घोषणा सन्दीपले होईन अमेरिका बस्दैं आएका एक दम्पत्तिले गरेका हुन् । सन्दीपले अन्तराष्ट्रिय खेलमा विकेट लिदा ५ डलर सहयोग गर्ने घोषणा चित्र गौतम र टीका ढकालले गरेका हुन् । भरतपुर १५ चितवनमा निर्माण हुन लागिरहेको बहुआयामिक गौतम बुद्ध क्रिकेट रंगशाला निर्माणको लागि सहयोग गर्ने अनौठो तरिका यी दम्पत्तिले खोजेका हुन् ।

उनीहरुले आफ्नो चौथो वैवाहिक वर्षगाँठको उपलक्ष्यमा उक्त घोषणा गरेका हुन् । साथै उनीहरुले दुईबर्ष अघि दिवंगत भएका क्रिकेट खेलाडी तथा आफ्ना सालो / भाई रमेश ढकालको सम्झनामा २२ हजार १ सय २३ रुपैयाँ धुर्मुस सुन्तली फाउण्डेसनलाई सहयोग गरेका छन् । सोही सहयोग प्रदान गर्ने क्रममा उनीहरुले सन्दीपले अबदेखि  अन्तर्राष्ट्रिय खेलमा लिने प्रत्येक १ विकेट बराबर ५ डलर क्रिकेट रंगशाला निर्माणको लागि सहयोग दिने भएका हुन् ।

यसका साथै यी दम्पत्ति रंगशाला निर्माणका लागि आर्थिक सहयोग जुटाउने अभियानमा समेत सामेल हुने भएका छन् । जनस्तरबाट नै ३ अर्ब लगानीमा निर्माण हुन लागिरहेको क्रिकेट रंगशालाका लागि यतिबेला देश तथा बिदेशबाट आर्थिक संकलनको काम भईरहेको छ । उता धुर्मुस सुन्तली फाउन्डेशनबाट सिताराम कट्टेल र कुञ्जना घिमिरे रंगशालाको भौतिक निर्माणको कार्यमा आफै खटिरहेका छन् । राष्ट्रिय गौरवकै रुपमा हेरिएको रंगशाला निर्माणको लागि मन खोलेर सहयोग गर्न उनीहरुले आग्रह गर्दे आईरहेका छन् ।

प्रतिक्रिया दिनुहोस

Loading...