बैंककको एक बारमा भीषण आगलागी, २७ जनाको मृत्यु

बैंकक । थाइल्यान्डको राजधानी बैंककस्थित एक बारमा भीषण आगलागी हुँदा कम्तीमा २७ जनाको मृत्यु भएको छ। 

थाइल्यान्डका प्रधानमन्त्री अनुटिन चानविराकुलले घटनास्थलमा सञ्चारमाध्यमलाई दिएको जानकारीअनुसार आगो सल्किएको उक्त भवनबाट २७ वटा शव निकालिएको छ भने अन्य घाइतेहरूलाई अस्पताल लगिएको छ।

आइतबार मध्यरातपछि अग्निनियन्त्रकहरू घटनास्थलमा पुग्दा ग्राहकहरू आगोको चपेटामा परेको मुख्य ढोकाबाट भागिरहेका थिए। सामाजिक सञ्जाल एक्समा सार्वजनिक भएका भिडियोहरूमा बारबाट आगोको लप्का निस्किएको र मानिसहरू चिच्याउँदै भागिरहेको देखिन्छ। 

भागदौडका क्रममा केही मानिस लडेका छन् भने कम्तीमा दुई जनाको शरीरमा आगो सल्किएको स्पष्ट देखिन्छ। अग्निनियन्त्रकहरूले करिब आधा घण्टामा आगो नियन्त्रणमा लिए पनि त्यतिन्जेलसम्म ठुलो क्षति भइसकेको थियो। स्थानीय सञ्चारमाध्यमका अनुसार ज्यान गुमाउने २७ जनामा नौ पुरुष र १८ महिला छन्।

अस्पतालमा ६० भन्दा बढी व्यक्तिको उपचार भइरहेको छ भने केही मानिस अझै बेपत्ता रहेको थाइ सञ्चारमाध्यम थाइराथले जनाएको छ। आगो लाग्ने बित्तिकै भवनको पछाडि भागेर शौचालयमा लुक्न खोज्दा धेरैको निसास्सिएर मृत्यु भएको थाइल्यान्डका प्रधानमन्त्री अनुतिन चानभिराकुलले सार्वजनिक टिप्पणी गरेका छन् ।

बैङ्ककको चाटुचक जिल्लामा रहेको उक्त बारको नाम ‘रोङ बियर ना लात फ्राओ’ रहेको र यो स्थानीय क्षेत्रमा निकै लोकप्रिय रेस्टुरेन्ट तथा मनोरञ्जन स्थल भएको बताइएको छ। आगलागी नियन्त्रण पछि सार्वजनिक भएका तस्बिरहरूमा बार बाहिर शव राखिएका झोलाहरू लस्करै देखिन्छन् भने भित्रपट्टि फर्निचर, पर्खाल र छत पूर्ण रूपमा जलेर नष्ट भएका छन्।