‘चिया क्षेत्रका चुनौती समाधानका लागि कूटनीतिक पहल आवश्यक’ : सांसद राई

काठमाडौँ । प्रतिनिधि सभामा नेपाली काँग्रेसका सांसद निष्कल राईले चिया उत्पादनसँग सम्बन्धित किसान तथा उद्योगीले भोगिरहेका समस्याप्रति सरकारको ध्यानाकर्षण गराउँदै समाधानका लागि पहल गर्न आग्रह गरेका छन्।

संसद् बैठकमा धारणा राख्दै उनले हाल चियाको पहिलो टिपाइको सिजन चलिरहे पनि किसानले आफ्नो श्रमअनुसारको प्रतिफल नपाएको अवस्था रहेको उल्लेख गरे। उत्पादन लागतअनुसार निर्धारण हुनुपर्ने न्यूनतम मूल्यसमेत व्यवहारमा सुनिश्चित हुन नसकेको उनको भनाइ थियो।

उनले कृषकहरूले मलको अभावजस्ता आधारभूत समस्यासमेत झेल्नुपरेको बताउँदै यसले उत्पादन र आय दुवैमा असर परेको संकेत गरे। साथै, चिया उद्योगसमेत विभिन्न कारणले दबाबमा रहेको उनको टिप्पणी थियो।

राईका अनुसार छिमेकी मुलुक भारतको पश्चिम बंगाल राज्य सरकार तथा सम्बन्धित निकायका नीतिगत कारणले पनि समस्या जटिल बनेको छ। यस्तो अवस्थालाई किसान वा उद्योगीको व्यक्तिगत प्रयासले मात्र समाधान गर्न नसकिने उल्लेख गर्दै उनले सरकारबाट कूटनीतिक माध्यममार्फत दीर्घकालीन समाधान खोजिनुपर्ने आवश्यकता औँल्याएका छन्।