पूर्वमन्त्री खड्का अस्पताल भर्ना

काठमाडौँ । स्वास्थ्यमा समस्या आएपछि हिजो पक्राउ परेका पूर्व ऊर्जा, जलस्रोत तथा सिँचाइमन्त्री एवं नेपाली काँग्रेसका नेता दीपक खड्का अस्पताल भर्ना भएका छन् ।

खड्कालाई आइतबार प्रहरीले पक्राउ गरेको थियो । सोही दिन अदालतले उनलाई ७ दिनसम्म थुनामा राखेर अनुसन्धान गर्न अनुमति दिएको थियो ।

तर, पक्राउ परेपछि खड्का आज बिहान त्रिवि शिक्षण अस्पतालमा भर्ना भएका छन् । अस्पताल स्रोतका अनुसार उनलाई बिहान करिब ३ बजे अस्पताल ल्याइएको हो । हाल उनी अस्पतालको १०२९ नम्बर बेडमा उपचाररत छन् ।

भदौ २४ गतेको जेन जेड आन्दोलनसँग सम्बन्धित घटनामा खड्काको घरमा जलेको अवस्थामा रकम फेला परेपछि अनुसन्धानका लागि उनलाई नियन्त्रणमा लिइएको गृहमन्त्री सुधन गुरुङले बताएका थिए ।

उक्त घटनासँग सम्बन्धित रकमको विषयमा सम्पत्ति शुद्धीकरण अनुसन्धान विभागले थप अनुसन्धान गरिरहेको छ ।