राष्ट्र बैंकले बजारबाट ४० अर्ब निक्षेप तान्दै

काठमाडौं । लामो समयदेखि बैंकिङ क्षेत्र अधिक तरलताको दबाबमा छन् । त्यस्तो तरलता व्यवस्थापनका लागि नेपाल राष्ट्र बैंकले बैंकिङ प्रणालीबाट निरन्तर निक्षेप खिचिरहेको छ । आइतबार पनि ४० अर्ब रुपैयाँ खिच्ने भएको छ ।

राष्ट्र बैंकले १७५ दिनका लागि उक्त निक्षेप तान्न आजै दिउँसो ३ बजे बोलकबोलको समय तोकेको छ । यसअघि राष्ट्र बैंकले २१, ४२ र ९० दिनका लागि निक्षेप तान्दै आएको थियो । तरलताको दबाब कायमै रहेका कारण राष्ट्र बैंकले समय अवधि बढाएर निक्षेप तान्न थालेको जनाएको छ ।

बोल गर्न सकिने रकम घटिमा १० करोड रुपैयाँ र बढीमा पाँच करोड रुपैयाँले भाग गर्दा आउने निःशेष भाग जाने गरी कुल आह्वान रकमसम्म रहेको छ । सावाँ तथा ब्याज भुक्तानी २०८३ सालको बैशाख १३ गते तोकिएको छ भने यसको ब्याजदर समेत बोलकबोलको माध्यमबाट हुनेछ ।

राष्ट्र बैंकका अनुसार निक्षेप संकलनको बोलकबोल ब्याजदरमा गर्नुपर्नेछ । बहु ब्याजदरमा पनि बहुबोलकबोल गर्न सकिनेछ । निक्षेप संकलन उपकरणको बोलकबोलमा नेपाल राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउने छन् ।