मलाई माया गर्ने थुप्रै जेनजीहरु विश्वभरि छन्: विनोद चौधरी

रुपन्देही । नेपाली कांग्रेसका केन्द्रीय सदस्य, निवर्तमान सांसद तथा उद्योगी विनोद चौधरीले आफूले निभाएको भूमिकाको इतिहास र जनताले लेखाजोखा गर्ने बताएका छन् । उनले आफ्नो कसैप्रति गुनासो नरहेको जनाएका छन् ।

सोमबार पश्चिम नवलपरासीको बर्दघाट नगरपालिका–७ बेलहानीस्थित आफ्नो निजी निवास निरीक्षणपश्चात् पत्रकारहरूसँग कुराकानी गर्दै चौधरीले आफूले सधैंभरी आर्थिक विकासलाई राज्यको केन्द्रबिन्दुमा राख्नुपर्छ भन्ने कुराको वकालत गर्दै आएको बताए ।

‘एउटा नयाँ जमात अब आउने निर्वाचनमा अगाडि उभिने वाला छ, उनले भने–‘ युवाको मनमा पटक्कै भोली यो नेपाल बन्छ भन्ने कुराको आस छैन । हतोत्साहित मनस्थिति छ । त्यसतर्फ हामी सबै जिम्मेवार मान्छेहरूले ध्यान दिनुपर्छ भन्ने कुराको वकालत मैले सधैँ गरेकै हुँ ।’

के कति हुन सक्यो, हुन सकेन भन्ने कुराको लेखाजोखा र जनताले गर्ने उनको भनाइ छ । आफूले जीवनभर परिवर्तन र सम्पन्न नेपालको अभिलाषा लिएर व्यावसायिक मञ्चहरूबाट र पछि नीति निर्माण र कार्यान्वयनको तहमा नबसीकन केही नहुने रहेछ भन्ने मान्यताका साथ राजनीतिमा प्रवेश गरेको चौधरीले बताए । ‘४५ दिनको अन्तरालमा म यो क्षेत्रमा आएर निर्वाचन लडे, एकसेएक महारथीहरूसँग, मलाई लाग्छ, त्यो बेला पनि यो मान्छे उभिँदा यसले विकासको बाटोमा केही गर्छ भन्ने भावनाले नै मलाई जिताउने काम भयो’ उनले भने ।

चौधरीले जेनजीको चाहना र संघर्षको बाटोमा आफू पनि ३० औँ वर्षदेखि हिँडेको बताए । ‘राजनीति मलाई न नामको लागि चाहियो, न दामको लागि चाहियो, मैले जे जति गरे, एउटा सम्पन्न नेपाल नेपालीले हेर्न पाउनुपर्छ, नेपालीको न्यूनतम अधिकारी हो । ‘एउटा युवाले स्वाभिमानी भएर विश्वमा टाउको उठाएर हिँड्न पाउनुपर्छ र त्यो गर्ने जिम्मेवारी हो’ उनले भने ।