अमेरिकी राष्ट्रपति ट्रम्पद्वारा इरानमा सत्ता परिवर्तनको संकेत

काठमाडौं  । अमेरिकी राष्ट्रपति डोनाल्ड ट्रम्पले इरानका परमाणु केन्द्रहरूमा सफल सैन्य कारबाही गरेको दाबी गरेपछि तेहरानको नेतृत्वमा सत्ता परिवर्तनको सम्भावनाबारे संकेत गरेका छन्। उनले वर्तमान इरानी सरकारले देशलाई “पुनः महान” बनाउन नसके सत्ता परिवर्तन आवश्यक हुने बताए।

ट्रम्पले आफ्नो सामाजिक सञ्जाल ट्रुथमा लेखे, “सत्ता परिवर्तन शब्द राजनीतिक रूपमा संवेदनशील भए पनि, यदि वर्तमान सरकार इरानलाई फेरि महान बनाउन असफल छ भने, परिवर्तन किन नहोस्?”

तर, आइतबार आयोजित पत्रकार सम्मेलनमा अमेरिकी रक्षामन्त्री पीट हेगसेथले इरानका परमाणु केन्द्रहरूमा भएको आक्रमणको उद्देश्य सत्ता परिवर्तन नभएको प्रष्ट पारे। उनले भने, “यो कारबाही सत्ता परिवर्तनका लागि थिएन, र अहिले पनि त्यस्तो कुनै लक्ष्य छैन।”

यस्तै, उपराष्ट्रपति जेडी वेन्सले एबीसी न्यूजसँगको कुराकानीमा भने, “हाम्रो लक्ष्य सत्ता परिवर्तन होइन, बरु इरानको परमाणु कार्यक्रमलाई रोक्नु हो।” अमेरिकाले शनिबार राति इरानका फोर्दो, नतान्ज र इस्फाहानस्थित परमाणु केन्द्रहरूमा बम आक्रमण गरेको थियो।