बोसनिया र मलेशिया पठाइदिन्छु भन्दै ठगी गर्ने दुई जना पक्राउ

काठमाडौँ । वैदेशिक रोजगारीमा आकर्षक तलबको प्रलोभनमा पारी बोसनिया र मलेशिया पठाइदिन्छु भन्दै रकम ठगी गरेको अभियोगमा दुई जना पक्राउ परेका छन् ।

पक्राउ पर्नेहरूमा लमजुङ दोर्दी गाउँपालिका-५ घर भएका हाल काठमाडौँ महानगरपालिका-१६ बस्दै आएको २६ वर्षीय दिपेन्द्र गुरुङ र सर्लाही बरहथवा घर भएका काठमाडौँ महानगरपालिका-१५ बस्ने ३४ वर्षीया रूपी माया रहेका छन् ।

प्रहरीका अनुसार दीपेन्द्रले बोसनिया पठाइदिन्छु भन्दै ६ जना पीडितहरूबाट ७ लाख रुपैयाँ र रूपीले मलेशिया पठाइदिन्छु भन्दै ६ जना पीडितहरूबाट ५ लाख ५७ हजार रुपैयाँ लिई सम्पर्कविहीन भएको थियो । उनीहरूलाई काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले दीपेन्द्रलाई आइतवार र रूपीलाई सोमवार पक्राउ गरेको हो ।

उनीहरूलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचल काठमाडौँ पठाइएको छ ।