मुस्ताङ मार्फामा प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आज मुस्ताङ मार्फास्थित शीतोष्ण बागवानी विकास केन्द्रको अवलोकन गरेका छन् ।अवलोकनका क्रममा अध्यक्ष प्रचण्डले केन्द्रमा भइरहेका बागवानीसम्बन्धी गतिविधिहरु, फलफूल तथा तरकारी उत्पादन र अनुसन्धान सम्बन्धी कार्यहरूबारे जानकारी लिएका थिए ।

उनले जलवायु अनुकूल खेती प्रणाली तथा प्रविधिको प्रयोगमार्फत स्थानीय उत्पादन वृद्धि गर्न केन्द्रको भूमिका उल्लेखनीय रहेको बताए । अवलोकनका क्रममा स्थानीय महिला उद्यमीहरूसँग अन्तरक्रिया गरे र ग्रामीण स्तरमा महिलाहरूको सक्रियता र आत्मनिर्भरता अभिवृद्धिमा यस्तो उद्योगले महत्वपूर्ण भूमिका खेल्ने विश्वास व्यक्त गरे । यस्ता उत्पादनमूलक क्रियाकलापले स्थानीय रोजगारी सिर्जना गर्नुका साथै कृषि उत्पादनको व्यावसायिकिकरणमा टेवा पुर्‍याउने उल्लेख गरे ।

अध्यक्ष प्रचण्डले हिमाली जिल्लाहरूको कृषि सम्भावनालाई उपयोग गर्दै आत्मनिर्भर अर्थतन्त्र निर्माणमा यस्ता संस्थाहरूको सशक्त योगदान आवश्यक रहेको उल्लेख गरे । साथै, उनले आगामी दिनमा सरकारी तर्फबाट प्राविधिक सहयोग तथा आवश्यक पूर्वाधार विकासमा साथ दिने प्रतिबद्धता पनि व्यक्त गरे । शीतोष्ण बागवानी विकास केन्द्रले उच्च हिमाली भेगका लागि उपयुक्त बागवानी प्रविधिहरू विकास गर्दै आएको छ ।