सरकारमा हुँदा गरेका कामलाई पुस्तकमा उतार्दै काँग्रेस

काठमाडौँ । नेपाली काँग्रेसले विसं २०१५ सालदेखि नै अहिलेसम्म सरकारमा हुँदा गरेका कामहरूको समेटेर पुस्तक सार्वजनिक गर्ने भएको छ । पार्टी उपसभापति पूर्णबहादुर खड्काले विगतमा काँग्रेस नेतृत्वको सरकारले गरेका कार्यलाई पुस्तकका रूपमा सार्वजनिक गर्ने तयारी गरिहरेको सोमबार जानकारी गराए ।

नीति, अनुसन्धान तथा प्रशिक्षण प्रतिष्ठानका प्रमुख समेत रहेका खड्काले काँग्रेसले विगतमा गरेका कार्यहरू जनतालाई जानकारी गराउन पुस्तकका रूपमा प्रकाशन गर्न लागिएको बताए ।

विसं २०१५ र २०४८ सालमा काँग्रेस नेतृत्वमा भएका कार्यहरू पनि पुस्तकमा समावेश हुने खड्काले जानकारी गराए । सबै अभिलेख खोजी गरेर पुस्तकको तयारी भएको उनको भनाइ छ ।

‘प्रतिष्ठानले पुस्तकको तयारीको काम अघि बढाएको छ । हामीले गरेका कामहरूलाई गाउँ गाउँमा बस्ती बस्तीमा पुर्‍याउँछौँ,’ खड्काले भने । काँग्रेसले गरेका परिवर्तनका कामहरू सबै सामू पुग्नुपर्ने खड्काले बताए ।

प्रतिनिधि सभा क्षेत्रीय सभापति तथा क्षेत्रीय प्रशिक्षण शाखा प्रमुखहरूको प्रशिक्षण तथा अभिमुखीकरणको क्रममा भैरहवामा बोल्दै खड्काले समस्या समाधान काँग्रेसले गर्न सक्ने भरोसा दिनुपर्ने बताए ।