अर्को केन्द्रीय समिति बैठकले मात्र महाधिवेशनको मिति तय गर्ने

काठमाडौँ । नेकपा माओवादी केन्द्रको अर्को केन्द्रीय समिति बैठकले मात्र महाधिवेशनको मिति तय गर्ने भएको छ । पार्टीको स्थायी कमिटी बैठकमा विशेष महाधिवेशनमा जाने वा नियमित महाधिवेशनमा जाने भन्ने विषयमा छलफल भए पनि कुनै निष्कर्षमा पुग्न नसकेको हो । 

यो केन्द्रीय समिति बैठकले महाधिवेशनको आधार तय गर्ने र अर्को केन्द्रीय समिति बैठकले आयोजक समिति बनाउने उपमहासचिव हरिबोल गजुरेलको भनाइ छ । ‘अहिले सङ्क्रमणकालीन अवस्था छ । पार्टीप्रति जनताको आकर्षण बढ्दै गइरहेको बेला यो केन्द्रीय समितिले महाधिवेशनको आधार तयार गर्ने र अर्को केन्द्रीय समिति बैठकले आयोजक समितिमा रूपान्तरण गरी महाधिवेशनको मिति तय गर्छ । अहिले संगठन निर्माणका लागि बढी ध्यान केन्द्रित गर्ने गरी छलफल भएको छ,’ उनले भने ।

बैठकमा संक्रमणकालीन अवस्थामा कार्यविभाजनका लागि संयन्त्र बनाएर जानेबारे प्रस्ताव गरिएको छ । खास गरी जिल्लाको जिम्मेवारी प्रदेशले तोक्ने इन्चार्ज केन्द्रले तोक्दा जिम्मेवारी बाँडफाँटमा समस्या देखिएकाले संयन्त्र बनाएर हल खोजिनुपर्ने प्रस्ताव आएको उपमहासचिव गजुरेलले जानकारी दिए ।

यस्तै बैठकमा बदलिँदो सूचना र प्रविधिको समयमा सोही अनुसार संगठनात्मक सिद्धान्त बनाउनुपर्नेबारे बहस केन्द्रित भएको गजुरेलले बताए । बदलिँदो सूचना र प्रविधिको समयमा संगठनात्मक सिद्धान्त सोही अनुसार हुनुपर्छ भन्नेबारे  बहस केन्द्रित भएको छ’, उनले भने, ‘यस्तै सङ्क्रमणकालीन अवस्थामा नेताहरूको उपयुक्त कार्यविभाजन कसरी गर्ने ? जिल्ला संयोजक प्रदेशले दिन्छ । इन्चार्ज केन्द्रले पठाउने गरेको छ । संयोजक र इन्चार्जबिच कसरी सन्तुलन गर्ने ?  उनीहरूलाई जिम्मेवारी कसरी दिने भन्ने विषयमा संयन्त्र बनाएर जाऊँ भन्ने भएको छ ।’

बैठकमा वैचारिक राजनीतिक आधार तयार गर्ने विषयमा पनि छलफल भएको उनले बताए । यस्तै पछिल्लो समय पार्टी एकतामा आएका नेताहरूलाई केन्द्रीय समिति बैठकमा बोलाउने निर्णय भएको उनले जानकारी दिए । पूर्वउपराष्ट्रपति नन्दकिशोर पुन पासाङलाई जिम्मेवारी दिने विषयमा प्रस्ताव आए पनि कुनै निर्णय नभएको उनले दाबी गरे । ‘पासाङजीलाई जिम्मेवारी दिने विषयमा प्रस्ताव आएको छ । तर कुनै निर्णय भएको छ । यसबारे उपयुक्त समयमा निर्णय हुने अध्यक्षले भन्नुभएको छ’, गजुरेलले भने ।

अर्का उपमहासचिव मात्रिका यादवले पनि बैठकले कुनै निर्णय नगरी सबै जिम्मेवारी केन्द्रीय समिति दिएको बताए । लेनिनकालीन संगठनात्मक सिद्धान्तबाट पछि हटेको नभई नेपालको परिवेशमा कसरी विकसित गर्ने भन्ने विषयमा छलफल केन्द्रित भएको उनले बताए । यसबारे पनि केन्द्रीय समिति बैठकले नै निर्णय गर्ने जानकारी दिए ।

यस्तै सचिव देवेन्द्र पौडेलले अहिले पार्टी संगठनमा देखिएको भद्रगोल अवस्थालाई अन्त्य गर्न संयन्त्र बनाएर जानेबारे छलफल भएको बताए । ‘नेताहरूको जिम्मेवारी सम्बन्धमा कुनै मापदण्ड बनेको छैन । वडा, पालिका, जिल्ला, प्रदेशसम्म सबैलाई जिम्मेवारी कसरी दिने भन्ने विषयमा छलफल भयो । अहिलेको सङ्क्रमणकालीन अवस्थामा अस्थायी रूपमा वरिष्ठताको आधारमा जिम्मेवारी दिएर पार्टीले थालेको अभियानमा पठाऔँ भन्ने प्रस्ताव आएको छ । यसबारे केन्द्रीय समितिले नै निर्णय गर्नेछ,’ पौडेलले भने ।

यसैगरी बैठकमा भएको छलफलबारे जानकारी दिँदै प्रवक्ता अग्निप्रसाद सापकोटाले संगठनात्मक सिद्धान्तबारे छलफल केन्द्रित भएको बताएका थिए । ‘स्थायी समिति बैठकमा संगठनात्मक सिद्धान्तबारे छलफल भयो । अहिलेसम्म हामीले सामान्यतः मालेमावादको सिद्धान्त मानेर आइरहेका छौँ । अहिलेको विज्ञान र प्रविधिको जमानामा नयाँ संगठनात्मक सिद्धान्त आवश्यक रहेकोबारे छलफल भएको । यसलाई क्रमभंग गरेर जानुपर्छ भन्नेमा छलफल भएको छ,’ उनले भने ।

उनका अनुसार उद्घाटनपछि प्रदेश अध्यक्षले रिपोर्टिङ गर्ने र त्यसपछि मात्र प्रचण्डले प्रतिवेदन पेस गर्ने कार्यसूची रहेको उनले जानकारी दिएका थिए ।