एमालेलाई इमेलमा पठायो महानगरले जरिवानाको पत्र

काठमाडौं । नेकपा एमालेले दरबारमार्गमा आयोजना गरेको जागरण सभाका क्रममा दरबारमार्गमा फोहोर गरेको भन्दै काठमाडौं महानगरले तोकेको जरिवानाको पत्र इमेलमा पठाइएको छ ।

हिजो महानगर प्रहरीसहितको टोली एमाले मुख्यालयमा पत्र लिएर गएको थियो । कार्यालय सचिवले कार्यक्रमको आयोजना उपत्यकाका ३ जिल्ला कमिटीले गरेकाले केन्द्रीय कार्यालयसँग असम्बन्धित भएको भन्दै पत्र बुझ्न अस्वीकार गरेका थिए ।

काठमाडौं महानगरपालिकाका सहायक प्रवक्ता ध्रुवकुमार काफ्लेले पार्टी कार्यालयमा पत्र बुझाउन जाँदा नबुझेकाले इमेलमार्फत पत्र पठाइएको नेपाल प्रेससँग बताए ।
उनले भने, ‘सुरूमा नगर प्रहरीले भौतिक रूपमा नै गएर पत्र बुझाउन खोजेको थियो । पत्र बुझ्न नममानेपछि महानगरपालिकाको नगर प्रहरी बलको आधिकारिक इमेलबाट नेकपा (एमाले) पार्टीको आधिकारिक इमेलमा पठाइएको छ ।’

त्यसो भए जरिवान तिराएकै छोड्न खोजेको हो महानगरपालिकाले भन्ने प्रश्नमा उनले भने, ‘जरिवाना गरिसकेपछि नतिर्ने भन्ने त सवाल नै भएन नि !’