रात्रिबस सञ्चालनमा रोक लगाउने विषयमा व्यवसायीसँग छलफल गर्दै गृह मन्त्रालय

काठमाडौँ। रात्रिबस सञ्चालनमा रोक लगाउने सम्बन्धमा गृह मन्त्रालयले यातायात व्यवसायीसँग छलफल गर्ने भएको छ । शुक्रबार बिहान दुई वटा बस त्रिशूलीमा खसेको प्रशंगलाई लिएर मन्त्रालयले अन्य दुर्घटनाको जोखिम न्यूनीकरणका लागि भन्दै रात्रिबस तत्कालका लागि बन्द गर्न व्यवसायीसँग छलफल गर्न लागेको हो । 

मन्त्रालयका विपद् तथा द्वन्द्व व्यवस्थापन महाशाखाका प्रमुख डा.भीष्मकुमार भुसालका अनुसार व्यवसायीसँगको छलफलपछि एउटा निष्कर्षमा पुगिने छ ।

उनले भने, ‘लागातारको वर्षापछि हाम्रा राजमार्गहरूमा बाढीपहिरो बढ्न थाल्यो, यसले यात्रा थप जोखिमपूर्ण हुने देखिएपछि व्यवयायीसँग हामीले छलफल गर्न लागेका हौं।’शुक्रबार बिहान काठमाडौंबाट गौर जान लागेको र बिरगंजबाट काठमाडौं आउँदै गरेको दुई वटा बस चितवनको सिमलताल भन्ने ठाउँमा त्रिशूलीमा बेपत्ता भएको थियो ।

दुवै बसमा यात्रुसहित ५४ जना बेपत्ता छन् । अहिले त्रिशुलीमा सेना, प्रहरी र सशस्त्र प्रहरीको टोलीले गोताखोरको माध्यमबाट बेपत्ता बस र यात्रुको खोजी गरिरहेका छन् ।