सरकारले गरेको कामलाई सफल बनाउन सबैले साथ दिनुपर्छ : पोखरेल

काठमाडौँ । नेकपा माओवादी केन्द्रका नेता गिरिराजमणि पोखरेलले सुशासनका पक्षमा सरकारले गरेको कामलाई सफल बनाउन सबैले साथ दिनुपर्ने बताएका छन् ।

माओवादी केन्द्र बागमती प्रदेश सम्पर्क समन्वय समितिको बैठकलाई सम्बोधन गर्दै नेता पोखरेलले माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको सरकारले मुलुकमा भ्रष्टाचार अन्त्य गर्दै सुशासनसहितको समृद्धिको लक्ष्य लिएको भन्दै सरकारको लक्ष्यलाई सफल बनाउन सबैले साथ दिनुपर्ने बताएका हुन् ।

उनले राजनीतिलाई अपराधीकरण गर्ने र अपराधलाई राजनीतिकरण गर्ने प्रवृत्तिलाई अन्त्य नगरे सम्म मुलुक आर्थिक विकासको बाटोमा अघि बढ्न नसक्ने बताए ।

नेता पोखरेलले मुलुकमा पश्चगामी शक्तिहरू शिर ठाडो पार्न खोजिरहेको अवस्थामा लडेर ल्याएको उपलब्धि जोगाउनुपर्ने काममा ध्यान केन्द्रित गर्नुपर्ने धारणा राखे । उनले मुलुकलाई अन्तराष्ट्रिय शक्तिले क्रिडास्थल बनाउन खोजिरहेको भन्दै राष्ट्रियताको जगेर्ना गर्नु अहिलेको कार्यभार रहेको पनि बताए ।

उनले सङ्गठनलाई बलियो बनाउन सकेमात्र पार्टी बलियो हुने भएकाले नेता तथा कार्यकर्ताले यसमा विशेष ध्यान दिनुपर्नेमा जोड दिएको छन् ।